Anzjana ta’ 75 sena mir-Rabat Għawdex tilfet ħajjitha fl-Isptar Ġenerali ta’ Għawdex, fejn ittieħdet għall-kura wara li sabet ruħha f’diffikultajiet waqt li kienet qed tgħum.
Għall-ħabta tal-5pm tal-bieraħ, l-anzjana kienet f’Bajja qrib Triq il-Menqa fiż-Żebbuġ u xi nies tellgħuha l-art wara li nnutaw li ma bdietx tħossha sew.
L-anzjana ttieħdet l-Isptar Ġenerali ta’ Għawdex b’Ambulanza. Madankollu, aktar tard hi tilfet il-ġlieda kontra l-mewt.
Bil-każ ġiet infurmata l-Maġistrat tal-għassa Joanne Vella Cuschieri, li ħatret diversi esperti biex jassistuha fl-Inkjesta li ġiet appuntata.
Aktar investigazzjonijiet tal-Pulizija għadhom għaddejjin.
