Is-Segretarju Ġenerali tan-Nazzjonijiet Uniti, Antonio Guterres, sejjaħ biex issir investigazzjoni dwar l-attakki mill-ajru qattiela li saru l-ġimgħa l-oħra fis-Sirja, fost allegazzjonijiet li r-rejds kienu twettqu minn ajruplani tal-gwerra tar-Russja.
Guterres esprima l-inkwiet kbir tiegħu dwar l-attakki tal-Ħamis fuq il-belt ta’ Zardana (fortizza tar-ribelli) fejn, fi kliem l-attivisti, inqatlu għexieren ta’ ċivili.
Hemm ukoll polemika dwar persuna li sfat fost il-maqtula u li, allegatament, ‘spiċċat mira ta’ ajruplan f’ħin meta kienet qed tipprova ssalva lin-nies f’Zardana’.
Sadattant, ir-Russja, li qed tappoġġja lill-President Sirjan, Bashar al-Assad, fil-gwerra ċivili tas-Sirja, qalet li dawn ir-rapporti ‘ma għandhom x’jaqsmu xejn mar-realtà’.
Intant, l-attakk fuq Zardana — fil-provinċja ta’ Idlib, li l-parti kbira tagħha hi kontrollata mir-ribelli ta’ kontra Assad — kien ‘l-aktar wieħed qalil u qattiel għal din is-sena.’
Skont is-Syrian Observatory for Human Rights – il-grupp għall-moniteraġġ li hu bbażat fir-Renju Unit – mietu tal-anqas 50 ċivili waqt ir-rejds speċifiċi fuq Zardana, bil-vittmi jinkludu numru ta’ tfal u nisa.
Sadattant, il-grupp inkwistjoni u l-organizzazzjoni bl-isem Difiża Ċivili tas-Sirja — li l-ħaddiema ta’ fejda magħha huma magħrufa bħala ‘tal-elmi bojod’ — it-tnejn jemmnu li l-attakki mill-ajru twettqu minn ajruplani tal-gwerra Russi.
Fl-istess ħin, l-istampa tar-Russja kkwotat lill-Ministeru tad-Difiża f’Moska li ċaħad għal kull sehem ‘mill-ajruplani tiegħu’ fl-attakki fuq Zardana. Ir-Russi qed jgħidu wkoll li ‘dakinhar’, f’Zardana, kien hemm diversi konfronti vjolenti bejn ribelli u ġiħadisti ma’ alleanza li għandha r-rabtiet mal-moviment terroristiku al-Qaeda.
