Ir-rivalità bejn il-plejer ta’ Real Madrid Cristiano Ronaldo u Barcelona kompliet tiżdied hekk kif id-difensur Spanjol li jilgħab ma’ Barcelona, Pique, akkuża lill-plejer Portugiż li jħobb jaqa’ għalxejn biex jirbaħ il-fawls.
Dawn il-kummenti minn naħa ta’ Pepe waslu wara li f;partita minn Grupp B il-Portugall u Spanja spiċċaw fi draw ta’ 3-3 b’Ronaldo jisraq ix-xena u jiskurja hat-trick.
Fl-azzjoni tal-ewwel gowl Ronaldo rebaħ penalty li skurja hu stess u meta l-iskor kien 3-2 favur Spanja żewġ minuti mit-tmiem Ronaldo rebaħ free kick meta twaqqa’ minn Pique u skurja ġmiel ta’ gowl biex salva punt għal pajjiżu.
“Kellna aktar ċansijiet minnhom u żgur li kien ħaqqna nirbħu l-logħba. Huma kellhom tliet ċansijiet u skurjaw tliet gowls. Dan hu l-futbol u rridu naċċettaw ir-riżultat.
Konna nafu li se nilagħbu kontra tim diffiċli u filwaqt li skurja tliet gowls, Ronaldo hu kapaċi anke jirbaħ il-fawls għax għandu tendenza jaqa’ għalxejn,” qal Pique.
Ta’ min jinnota li nhar il-Ġimgħa Ronaldo sar l-ewwel plejer fl-istorja li qatt skurja fi tmien turnaments maġġuri konsekuttivi. L-ewwel gowl tiegħu kien wasal fl-Euro 2004. Minn dakinhar ‘l hawn skurja fi tliet Kampjonati Ewropej oħra u f’erba’ edizzjonijiet tat-Tazza tad-Dinja.
Barra minn hekk hu sar anke l-ewwel plejer li qatt skurja hat-trick kontra Spanja fit-Tazza tad-Dinja.
