‘Din hija liġi li se teqred il-ħajja qabel it-twelid. Liġi li se toqtol l-ugwaljanza qabel it-twelid’, hekk qal il-Kap tal-Oppożizzjoni Adrian Delia waqt konferenza tal-aħbarijiet fil-Parlament qabel il-vot fuq l-emendi għal-liġi dwar il-protezzjoni tal-embrijuni.
Adrian Delia qal li dan huwa Gvern li jiftaħar bl-ugwaljanza u l-opportunitajiet indaqs iżda mhux lesti li jagħti l-istess opportunitajiet lill-embrijun, li hija ħajja umana. Huwa qal li l-Gvern qal li kien se jkun hawn diskussjoni twila iżda minflok ipprova jżeblaħ s-soċjetà ċivili. Minflok diskussjoni serja, l-Gvern li jisma’ ma tax widen l-anqas lil mijiet ta’ professjonisti u akkademiċi u sar kollox bl-għaġla.
Il-Kap tal-Oppożizzjoni qal li filwaqt li l-Gvern jgħid li huwa favur il-ħajja, bl-emendi li ressaq għal-liġi tal-IVF ma tax garanzija għall-ħajja u minflok żied l-ammont tal-embrijuni li jistgħu jiġu ffriżati. Għalhekk din hija liġi li tikkalpesta d-drittijiet fundamentali u l-libertajiet tat-tfal. Adrian Delia qal li b’din il-liġi, l-Ministru għażel li jieħu f’idejh id-dritt tal-ħajja u l-mewt.
Adrian Delia qal li din il-liġi hija l-essenza ta’ dak kollu li l-politiċi m’għandhomx jagħmlu, għax il-politika qegħda hemm sabiex tagħti struttura lis-soċjetà. Adrian Delia qal li minflok se titnawwar il-fibra tas-soċjetà tagħna, għax il-Gvern irid soċjetà bla identità.
Il-Partit Nazzjonalista jrid soċjetà li jimpurtaha. Il-Gvern li tilef ir-ruħ soċjali qed joħloq a soul less state.
