Il-liġi li daħħlet l-iffriżar tal-embrijuni hi l-oppost tal-missjoni ewlenija ta’ kull min hu fil-politika; dik li jħares u jtejjeb il-qafas tas-soċjeta’. Sostna dan il-Kap tal-Partit Nazzjonalista’ Adrian Delia intervistat waqt il-programm Iswed Fuq l-Abjad
Kompla li l-liġi issa tmur kontra l-isem tagħha stess għaliex l-embrijun issa m’għadux protett. Il-Kap tal-PN fakkar li l-Gvern Laburista m’għandux mandat li jdaħħal l-iffriżar tal-embrijuni u tenna mill-ġdid li Gvern Nazzjonalista ibiddel il-partijiet tal-liġi li jippermettu jew ma jħarsux kontra t-telf tal-ħajja.
Dwar l-immigrazzjoni, Adrian Delia qal li l-pożizzjoni tal-Partit Nazzjonalista baqgħet waħda konsistenti, id-difiża tal-ħajja umana u d-difiża tal-interess nazzjonali.
Il-Kap tal-PN irrefera għall-kwistjoni li nqalgħet mal-Italja dwar il-bastiment Aquarius u qal li l-Italja kisret il-liġi internazzjonali u Malta m’għandix iċċedi għal tentattivi ta’ intimidazzjoni
Għal dak li għandu x’jaqsam mal-ġustizzja, Adrian Delia, li hu wkoll il-kelliem għall-Ġustizzja, qal li l-Gvern qed jipprova jqarraq meta jgħid li qed idaħħal iktar Maġistrati għaliex it-tliet avukati li qed jissemmew biex jinħatru Maġistrati se jkunu qed jieħdu post tliet Maġistrati li se jinħatru Imħallfin.
