Il-Union tal-Ghalliema, l-MUT, iddikkjarat tiwlima industrjali mas-Segretarjat għall-Edukazzjoni Nisranija li bħalissa għaddejja bid-diskussjonijiet dwar il-ftehim il-ġdid għall-għalliema fl-iskejjel tal-Knisja.
Fl-istqarrija l-MUT qalet li n-negozjati fallew minħabba li t-talba tagħha biex l-għalliema fl-Iskejjel tal-Istat u fl-Iskejjel tal-Knisja jkollhom l-istess kundizzjonijiet mhux qed jintlaqgħu mill-awtoritajiet tal-Iskejjel tal-Knisja.
Fl-istqarrija l-MUT telenka sitt punti fejn ma ntlaħaqx ftehim. L-ewwel – L-awtoritajiet tal-Knisja ma jridux jaqblu fuq mekkaniżmu fejn għalliema fi skejjel tal-Knisja jkunu jixtiequ jgħallmu fi skola oħra tal-Knisja. It-tieni nuqqas ta’ ftehim huwa dwar l-għoti ta’ laptops lil-LSEs u Kindergarten Assistants fl-Iskejjel tal-Knisja. L-MUT tallega ukoll li l-Awtoritajiet tal-Knisja qed jippruvaw jaddottaw mekkaniżmu li jagħżlu huma liema metodi ta’ assessjar iridu u dan se jwassal għal żieda fl-ammont ta’ xogħol għall-għalliema.
L-MUT takkuża wkoll lill-awtoritajiet tal-Knisja li qed jimpjegaw għalliema mħallsa mill-iskejjel infushom b’salarji inqas minn għalliema simili fl-iskejjel tal-istat.
L-MUT takkuża wkoll lis-Segretarjat għall-Edukazzjoni Nisranija li mhux tikkumpensa għax-xogħol żejjed li qed jagħmlu l-għalliema fil-preparazzjoni tal-karti tal-eżami u li qed tħalli barra min-negozjati seba’ counsellors li l-pagi tagħhom dejjem kienu skont il-ftehim settorjali.
Quddiem din is-sitwazzjoni l-MUT qalet li qed tiddikkjara bl-iktar mod ċar li mhux se taċċetta kundizzjonjiet inferjuri għall-għalliema tal-Iskejjel tal-Knisja u se tkun qed issejjaħ lill-għalliema tal-Iskejjel tal-Knisja għal laqgħa li fiha tagħti d-dettalji dwar l-aħħar żviluppi dwar din it-tilwima industrjali.
