Sewwieq ta’ mutur ta’ 43 sena minn Ħal Balzan tilef ħajtu wara li kien involut f’inċident tat-traffiku fl-Imsida. Tfajla li kienet passiġġiera miegħu hija Pollakka li għandha madwar 30 sena u tinsab fil-periklu tal-mewt.
Il-każ seħħ fl-4pm fi Triq Mikiel Anton Vassalli l-Imsida, ġewwa l-mini li jinsabu taħt l-iskatepark hekk kif għal xi raġuni mhux magħrufa s-sewwieq tilef il-kontroll tal-mutur u qabad il-bankina, biż-żewġ persuni jittajru minn fuq il-mutur.
Fuq il-post issejħet l-għajnuna tal-Pulizija kif ukoll tim mediku tal-ambulanzi li ħadu liż-żewġ vittmi l-isptar għal aktar kura. Sfortunatament is-sewwieq tal-mutur tilef ħajtu ftit wara fl-Isptar Mater Dei.
Il-mina fid-direzzjoni tal-Marsa ingħalqet għat-traffiku għal xi ħin hekk kif inħatret inkjesta maġisterjali, bil-Maġistrat Monica Vella li qed tmexxi l-inkjesta.
