Il-Kanċillier tal-Ġermanja Angela Merkel, illum, talbet lill-Mexxejja tal-Unjoni Ewropea biex ma jħallux li l-immigranti li qegħdin ifittxu l-kenn politiku imorru fejn iridu b’mod ħieles fit-territorji tal-Unjoni. Dan meta l-issue inkwistjoni qed thedded il-koalizzjoni li, fil-preżent, qed tamministra lill-Ġermanja.
Il-Mexxejja tal-Gvernijiet li ltaqgħu fi Brussell qegħdin jippruvaw jirranġaw id-diżgwid ta’ bejniethom dwar l-immigrazzjoni, meta d-differenzi bejn il-pajjiżi ilhom is-snin problema għall-UE. Is-sitwazzjoni anki qed timponi piż sinifikanti fuq il-koalizzjoni Ġermaniża mmexxija minn Merkel.
It-taħditiet fi Brussell kienu jinvolvu sittax fost it-tmienja u għoxrin mexxejja nazzjonali u Merkel spjegat li d-diskussjoni, fost oħrajn, kellha titratta miżuri għall-ħarsien tal-fruntieri esterni (tal-pajjiżi Ewropej) u l-mod kif l-Istati tal-UE jistgħu jnaqqsu l-immigrazzjoni illegali lejn l-Ewropa.
L-aħħar stħarriġ tal-opinjoni qed juri li l-immigrazzjoni hi l-aktar ħaġa li tħasseb lill-500 miljun ċittadin tal-UE.
Sadanittant, il-Prim Ministru Taljan, Giuseppe Conte, qal li hu u l-mexxejja l-oħra riedu jindirizzaw il-problema tal-immigrazzjoni b’mod strutturat u bħalma jridu ċ-ċittadini, skont l-aħħar stħarriġ popolari. Hu, intant, kellu juża l-laqgħa ta’ Brussell biex jipproponi l-ideat ġodda tiegħu dwar l-immigrazzjoni.
