L-għajta tal-Kap tal-Partit Nazzjonalista Adrian Delia għal Pjan fit-Tul għal Malta u Għawdex telgħet fil-quċċata tal-aġenda nazzjonali, b’numru ta’ gazzetti f’dawn il-jumejn, jiktbu bi prominenza dwar il-qagħda tal-pajjiż, in-nuqqas ta’ pjanar u l-ħtieġa ta’ pjan fit-tul għal Malta.
Fl-iktar ħarġa riċenti, il-gazzetta Times of Malta ippubblikat editorjal fejn għal darba darbtejn, il-Partit Nazzjonalista ngħata raġun dwar it-twissijiet tiegħu għal pjan fit-tul.
“Joseph Muscat jista’ jinjora t-twissijiet tal-Partit Nazzjonalista dwar il-possibiltà ta’ influss ta’ ħaddiema barranin fuq l-ekonomija u l-aspett soċjali tal-pajjiż – imma fl-aħħar mill-aħħar, se jkun il-pajjiż li jitlef jekk ma jkunx hemm pjan sostenibbli dwar dak li għandu bżonn isir”, jgħid l-editorjal.
F’parti oħra, dwar l-għafsa fuq l-infrastruttura tal-pajjiż minħabba nuqqas ta’ pjan fit-tul, l-editorjal ta’ The Times jgħid: “Mhuwiex il-Partit Nazzjonalista biss li qed iwissi dwar l-impatt tan-nuqqas ta’ sostenibilità. Osservaturi ekonomiċi qed jgħidu l-istess ħaġa”.
Dwar il-kwistjoni tal-eluf kbar ta’ ħaddiema barranin li l-Gvern irid iġib f’Malta, iqumu mistoqsijiet dwar il-problemi dejjem jikbru ta’ kirjiet għoljin ħafna li qed jisfurzaw familji joħorġu minn djarhom biex imorru jorqdu fil-garaxxijiet u l-karozzi.
Dwar l-għafsa tal-influss ta’ ħaddiema barranin fuq l-infrastruttura u s-servizzi tal-pajjiż, f’analiżi dettaljata, l-editur tal-gazzetta ‘Illum’ Albert Gauci Cunningham jistaqsi:
“Il-Jobs Plus qed tinnegozja biex ikunu importati ħaddiema barranin f’Malta. Imma pajjiżna jiflaħ għal iktar? U jaqlilna jew le?”
U minn analiżi tal-pożittiv u n-negattiv, jidentifika żieda fil-kirjiet; pajjiż aktar iffullat; iktar bini u inqas spazju; spiża ikbar fuq is-sistema tal-welfare; u ż-żamma ta’ pagi fl-istess livell bħala n-naħa l-kerha ta’ nuqqas ta’ pjan fit-tul.
