L-istazzjon tar-radju tal-Partit Nazzjonalista se jkun qed iniedi skeda ġdida wara ħidma kbira li saret fil-ġimgħat u x-xhur li għaddew biex l-istazzjon ikun imġedded.
Ħabbar dan iċ-Chairman Eżekuttiv ta’ Media.Link Communications Pierre Portelli meta kien qed jiġi intervistat fil-programm NET Live.
“Bdejna bil-ħidma tagħna biex naraw x’hemm bżonn li jsir fir-radju. U nista’ ngħid li fit-Tnejn 2 ta’ Lulju tibda l-iskeda l-ġdida”, ħabbar Pierre Portelli meta nnota li minkejja l-fenomenu tal-media soċjali, ir-radju baqa’ jikber xorta waħda minħabba numru ta’ fatturi – fosthom iż-żieda fit-traffiku.
Meta qabbel l-udjenzi tar-radju fl-2003 mal-udjenzi tal-lum, Pierre Portelli nnota tnaqqis kbir fl-udjenzi – udjenzi magħmula kważi esklussivament minn persuni li jilħqu l-età ta’ 60 sena.
“Waqt li rridu li r-radju tagħna jkompli jitkellem u jikkomunika ma’ dawn in-nies, ma jistax ikun li ninsew lill-oħrajn kollha”, qal Pierre Portelli qabel insista dwar l-impenn ta’ Media.Link li tifrex l-udjenzi tagħha.
Pierre Portelli ħabbar ukoll li l-ħin iddedikat għad-diskussjonijiet fuq ir-radju se jkun qed jiżdied – flimkien ma’ ideat u inizjattivi ġodda. “Mil-lum nista’ ngħid ukoll li t-talba kbira li ilhom jagħmlu s-semmiegħa tagħna, biex jiżdied il-ħin tad-diskussjoni fuq ir-radju, se tintlaqa'”, żied jgħid waqt li qal ukoll li l-iskeda l-ġdida se tkun qed tara vuċijiet u ideat ġodda.
Pierre Portelli żied li fuq kollox, l-istazzjon tar-radju se jkun qed jingħata libsa ġdida, f’dik li ddeskriva bħala identità waħdanija tar-radju.
It-tibdil fl-istazzjon rar-radju qed jaħbat mal-20 anniversarju mill-ftuħ ta’ NET Television.
Filfatt, fl-istess intervista, iċ-Chairman Eżekuttiv tkellem ukoll dwar NET Television – fejn qal li għalkemm l-iskeda ta’ Ottubru hija l-iktar waħda importanti, fis-sajf se jkun hemm xi żidiet – fosthom programm tas-sajf minn ħdejn il-baħar u programm ġdid li se jkun qed jagħti ħarsa lejn l-20 sena ta’ NET Television.
Pierre Portelli temm jappella għall-appoġġ minn dawk li għandhom għal qalbhom il-media tal-Partit Nazzjonalista.
