Il-ħolma tal-Iżlanda fit-Tazza tad-Dinja ntemmet fil-fażi tal-gruppi wara li sfaw megħluba 2-1 mill-Kroazja, li kkonfermaw posthom fil-quċċata ta’ Grupp D. L-Iżlandiżi kellhom wirja qalbiena li fiha resqu diversi drabi li jiskorjaw. Il-kowċ Kroat Zlatko Dalic għamel disa’ bidliet mir-rebħa kontra l-Arġentina.
Lejn tmiem l-ewwel taqsima, Birkir Bjarnason kellu żewġ xuttijiet blokkati f’korner u Lovre Kalinic għamel save mill-isbaħ fuq xutt ta’ Aron Gunnarsson.
Ftit wara l-ftuħ tat-tieni taqsima, MILAN BADELJ poġġa lill-Kroazja minn fuq b’xutt sabiħ mill-kaxxa wara kross ta’ Ivan Perisic.
L-Iżlanda kompliet tagħfas għad-draw u kwarta mit-tmiem ingħataw penalty meta l-kross mix-xellug ta’ Bjarnason ħabat ma’ id id-difensur Dejan Lovren. Mill-11-il metru GYLFI SIGURDSSON spara ċentralment fin-naħa ta’ fuq tax-xibka.
Sa dak il-ħin huma kellhom bżonn gowl biex jgħaddu wara li l-Arġentina marret minn fuq kontra n-Niġerja. Huma pressaw għall-gowl tar-rebħa iżda f’kontrattakk fid-90 minuta kien Perisic li rċieva ballun mix-xellug f’tarf il-kaxxa u spara wara Hannes Halldorsson biex assigura rekord perfett fi Grupp D.
Din kienet l-ewwel darba li l-Kroazja rebħet tliet logħbiet konsekuttivi fit-Tazza tad-Dinja.
