L-infermiera u l-qwiebel kollha li jiffurmaw parti mill-MUMN, minn nhar il-Ħamis 5 ta’ Lulju se josservaw lista twila ta’ direttivi f’kull sptar u ċentru tas-saħħa pubbliku wara li għad m’hemm l-ebda żvilupp pożittiv dwar ftehim settorjali għalihom.
Waqt konferenza tal-aħbarijiet quddiem l-Isptar tal-Onkoloġija, is-Segretarju Ġenerali tal-MUMN Colin Galea ddikjara s-sitwazzjoni bħala waħda ta’ kriżi hekk kif pajjiżna għandu nuqqas ta’ mill-inqas 550 nurse.
Dan ifisser li fi sptarijiet bħal Monte Karmeli, ma tistax issir osservanza kontinwa tal-pazjenti li wħud minnhom jistgħu jkunu ta’ periklu għalihom u għal ħaddieħor, fl-emerġenza mhux jinżammu ratios internazzjonali fejn suppost ikun hemm nurse għal kull pazjent, qed jitħassru l-operazzjonijiet ta’ kull ġimgħa waqt li f’kull ward tal-Isptar Mater Dei hemm vakanza ta’ persuna jew tnejn.
Fil-ward meqjusa bħala l-ITU tal-Isptar tal-Onkoloġija hemm nuqqas ta’ sitt infermieri waqt li infermieri fl-Isptar San Vinċenz de Paule hemm swali fejn wieħed isib biss infermier jew infermiera waħda għal 40 anzjan u anzjana.
Hemm ukoll il-problema li l-Gvern ma nkludiex skemi ta’ rtirar kmieni fil-kontro-proposti tiegħu, li waslu b’dewmien esaġerat seba’ xhur wara li l-MUMN ressqet il-proposti tagħha u talbet biex jibdew in-negozjati għall-Ftehim Settorjali ġdid kif ukoll baqa’ jirrifjuta li jiltaqa’ mal-union.
Ma ġewx indirizzati wkoll diversi punti li tqajjmu fid-dokument tal-MUMN, għadu baxx wisq in-Nursing Premium kif ukoll ċerti gradi fl-istruttura tas-salarji ma ġewx indirizzati jew ma ġewx indirizzati biżżejjed.
Colin Galea ddikjara li l-Gvern qed juri nuqqas ta’ sensittività mal-pazjenti, qed jippermetti li n-nies ibatu kuljum, “iżda l-pazjenti mhux riżma karti li tpoġġihom f’kexxun u tati kashom meta jiftillek.”
Wissa’ wkoll li jekk il-Gvern jagħmel xi mandat ta’ inibizzjoni fil-Qorti, biex jilqa’ għal dawn id-direttivi kif għamel lil unions oħra, dan il-mandat se jiġi injorat. Dawn il-passi “li jsiru biex iwaqqfu lill-union milli teżerċità d-drittijiet tagħha, imorru kontra kull sens ta’ demokrazija.”
