Ir-raġel li nstab mejjet fl-inħawi taż-Żonqor f’Marsaskala huwa l-kok popolari Taljan Stefano Mascellani.
Mascellani kellu 44 sena meta nstab mejjet għall-ħabta tal-għaxra u nofs ta’ filgħodu mitluq mal-art, fejn aktar tard kien anke ċċertifikat mejjet.
Skont rapport fil-media Taljana, ir-raġel aktarx miet b’attakk tal-qalb waqt li kien qed jiġri. Madanakollu, skont l-aħħar informazzjoni uffiċjali, kellha ssir awtopsja fuq il-katavru biex tistabilixxi eżattament il-kawża tal-mewt.
Isem il-kok Stefano Mascellani huwa popolari f’Malta kemm mal-Maltin kif ukoll mal-komunità Taljana f’Malta, partikolarment minħabba stabbiliment tal-ikel fil-Birgu li tiegħu kien il-kok.
Mascellani kien jiġi minn familja bi storja twila fil-qasam kulinarju u oriġinarjament kien minn Badia Polesine f’Veneto fl-Italja.
