Għall-ewwel darba f’dikjarazzjoni dwar l-immigrazzjoni l-Unjoni Ewropea għażlet li ma tagħtix każ tal-problemi li pajjiżna jaffronta u filfatt ma jissemew imkien.
Il-Partit Nazzjonalista qal dan fi stqarrija ffirmata mill-Kelliema Carm Mifsud Bonnici u David Stellini, responsabbli mill-Affarijiet Barranin u Ewropej rispettivament.
L-Oppożizzjoni qalet dan wara li l-Kunsill Ewropew bejn il-mexxejja Ewropej ikkunsidra b’soluzzjonijiet l-interessi ta’ pajjiżi oħra bħall-Italja, l-Ġermanja, Spanja u l-Greċja filwaqt li l-interessi ta’ Malta ġew injorati.
Fuq kollox il-Partit Nazzjonalista nnota li hu ta’ diżappunt li matul l-aħħar summit, il-mexxejja tal-pajjiżi membri tal-Unjoni Ewropea baqgħu ma waslux għal qbil fuq il-qsim tal-piż tal-immigrazzjoni, u dan sabiex ikun wieħed mandatorju u ma jibqax biss volontarju.
Il-Partit Nazzjonalista qal li fid-dawl tas-sitwazzjoni preżenti kif ukoll tal-aħħar każijiet ta’ immigrazzjoni irregolari fil-Mediterran, wieħed kien jistenna li dan iseħħ, għax pajjiżna se jsib ruħu f’diffikultajiet jekk ikollu jaffronta sfidi akbar fix-xhur li ġejjin. Iktar u iktar meta wieħed jikkonsidra li matul dawn l-aħħar erba’ snin l-isfida tal-immigrazzjoni rregolari ġiet traskurata.
Dwar diskussjoni dwar ħolqien ta’ reception centres f’pajjiżi fl-Afrika, il-Partit Nazzjonalista qal li l-Oppożizzjoni hi favur il-ħolqien ta’ dawn iċ-ċentri li joffru sigurtà, li josservaw id-drittijiet tal-bniedem u japplikaw ir-regoli għall-protezzjoni ta’ dawk li ħaqqhom protezzjoni internazzjonali. Għalhekk l-Oppożizzjoni tħeġġeġ lil Joseph Muscat sabiex jikkonvinċi lill-Prim Ministri fil-grupp politiku tiegħu, li jidher li mhux jaqblu mal-ħolqien ta’ dawn iċ-ċentri.
Il-Partit Nazzjonalista tkellem ukoll dwar il-European Asylum Support Office li minkejja l-importanza tiegħu, tħalla barra mid-dikjarazzjoni li saret wara s-summit; u kif ukoll fuq l-importanza ta’ investiment dirett fl-Aftika kemm mill-privat kif ukoll mill-fondi ta’ żvilupp – sabiex jonqsu r-raġunijiet għaliex ikun hemm ħafna nies li jemigraw lejn l-Ewropa.
Dwar it-trattat ta’ Dublin, l-Oppożizzjoni qalet li tistenna li ssir riforma b’appell għall-Gvern biex jaħdem lejn din id-direzzjoni bil-Partit Nazzjonalista jżid li l-Unjoni Ewropea ma tistax tħalli l-pajjiżi li jinsabu l-eqreb tal-Afrika waħedhom, għax l-Ewropa hija territorju wieħed u kull diffikultà li jaffaċċja pajjiż membru wieħed għandha titqies daqslikieku diffikultà tal-Ewropa kollha.
L-Oppożizzjoni temmet tgħid li se tkompli tesiġi li l-Gvern ikun trasparenti mal-poplu kollu dwar l-immigrazzjoni sabiex ikun hawn qbil nazzjonali u għalhekk l-Oppożizzjoni se tibqa’ tixpruna lill-Gvern sabiex l-interess nazzjonali jiġi mħares.
