Finalment se tiġi rtirata l-liċenzja tal-Bank Pilatus tliet xhur wara li s-sid tiegħu ġie arrestat fl-Istati Uniti bi ħsara kbira u rreparabbli għar-reputazzjoni pajjiżna. Dan ukoll wara snin ta’ appelli kontinwi mill-Oppożizzjoni Nazzjonalista kif ukoll mis-settur finanzjarju biex tittieħed azzjoni fil-konfront tal-istess bank.
Dan ifisser li l-Bank Pilatus ma jistax jopera iktar minn pajjiżna wara li l-MFSA talbet lill-Bank Ċentrali Ewropew biex jirtira l-liċenzja tiegħu. L-MFSA ammettiet li l-bank kien ilu jikser ir-regoli finanzjarji skont l-Att Bankarju, iżda minkejja dan ma ttieħdet l-ebda azzjoni qabel illum.
Dan ifisser li l-Partit Nazzjonalista ngħata raġun wara snin ta’ appelli biex dan il-bank jingħalaq.
Fost dawk li kellhom kontijiet fil-Bank Pilatus hemm iċ-Chief of Staff tal-Prim Ministru, Keith Schembri, il-Ministru Konrad Mizzi u l-konsulent ta’ Joseph Muscat, Brian Tonna ta’ Nexia BT. Dan minbarra sensiela ta’ politiċi barranin, fosthom mill-familja li tmexxi l-Ażerbajġan, li dwarhom hemm diversi suspetti internazzjonali ta’ korruzzjoni.
Fil-Pilatus Bank kien hemm ukoll kont tal-kumpanija Egrant, li nfetħet inkjesta maġisterjali biex tistabilixxi jekk dan il-kont hux tal-mara tal-Prim Ministru Joseph Muscat.
Bħalissa għaddejja wkoll investigazzjoni konġunta dwar allegat ħasil tal-flus li kien qed isir fil-Bank Pilatus, waqt li mistennija wkoll titlesta evalwazzjoni tal-Bank Ċentrali Ewropew li tista’ twassal biex jittieħdu azzjonijiet oħra.
