Minkejja li l-Prim Ministru Joseph Muscat qed jipprova jagħti x’jifhem li s-Summit bejn il-Mexxejja Ewropej għen fl-isfidi kontra l-immigrazzjoni irregolari, mhux tal-istess idea kienet il-media indipendenti, li ddeskriviet is-Summit bħala wieħed xott u li mhu se jwassal imkien.
Fuq l-istazzjon tar-radju tal-Partit Laburista, Muscat kien kawt, għalkemm qal li matulu kien hemm l-għodda kontra din l-isfida importanti.
Fil-ħarġa tagħhom, il-gazzetta tal-GWU qalet li s-Summit mhu se jsolvi xejn, il-gazzetta MaltaToday qalet li s-Summit kien xott u l-gazzetta The Malta Independent on Sunday qalet li s-Summit ma pprovda l-ebda soluzzjoni.
Min-naħa tiegħu, il-Kap tal-Partit Nazzjonalista Adrian Delia qal li l-Oppożizzjoni se tibqa’ tixpruna lill-Gvern fuq il-kwistjoni bi qbil nazzjonali u sakemm l-interess nazzjonali jiġi mħares.
Fil-jiem li għaddew, il-Partit Nazzjonalista diġà nnota b’diżappunt il-fatt li matul is-Summit, il-Mexxejja Ewropej baqgħu ma waslux għal qbil fuq il-qsim tal-piż tal-immigrazzjoni biex il-qsim ikun wieħed mandatorju u ma jibqax volontarju.
Il-Partit Nazzjonalista nnota kif għall-ewwel darba dwar l-immigrazzjoni, l-Unjoni Ewropea għażlet li ma tagħtix każ il-problemi li pajjiżna qed jaffronta, tant li dawn ma ssemmew imkien.
