Ir-residenti ta’ Ħ’Attard li jagħmlu parti mill-Attard Residents Environmental Network wasslu ittra lill-Prim Ministru Joseph Muscat sabiex jikkunsidra mill-ġdid id-deċiżjoni li tinbena bypass f’Ħ’Attard.
L-ittra hi ffirmata minn 432 persuna li fost oħrajn jinnutaw kif dan il-proġett se joħloq diversi sfidi ġodda għar-residenti, se jeqred medda kbira ta’ art agrikola u se taffettwa mas-47 bidwi li se jitilfu l-għelieqi tagħhom jew partijiet minnhom.
Innutaw ukoll li b’dan il-proġett, dik li s’issa hi ona ħadra u kwieta se tinbidel fi triq arterjali bil-konsegwenza li r-residenti se jiġu esposti għal storbju bla waqfien u traffiku.
Dan minbarra li l-proġett se jwassal għal telf ta’ spazju ta’ parkeġġ fi Triq Ferdinand Inglott u Triq Tumas Chetcuti, bil-konsegwenza li tikber il-problema ta’ parkeġġ f’toroq sekondarji. Se jitneħħa wkoll parkeġġ privat ta’ stabbiliment fi Triq Ferdinand Inglott.
Ir-residenti jinnutaw ukoll li se jitwaqqaw irziezet li s’issa kienu jintużaw u għad fadal fihom numru ta’ annimali u se jiġġarfu serer u ġibjuni li jintużaw għall-irrigazzjoni. Dan bil-konsegwenza li bdiewa u raħħala li jaqilgħu x’jieklu mill-għelieqi tagħhom, issa se jitilfu dan id-dħul. Jinnutaw ukoll li fost is-siġar li se jitqaċċtu hemm uħud protetti u tal-frott.
Minflok, l-432 firmatarju jitolbu lill-Gvern biex jipposponi l-proġett u joħroġ b’alternattivi, bħall-bini ta’ mina taħt l-art biex b’hekk tonqos il-qerda ta’ art agrikola u tiġi limitata d-devoluzzjoni fil-prezz tal-proprjetà.
