Il-Qorti, permezz tal-Maġistrat Claire Stafrace Zammit, se tkun qed tagħti deċiżjoni dwar talba ġdida biex it-tliet akkużati fil-każ tal-qtil ta’ Daphne Caruana Galizia jingħataw il-ħelsien mill-arrest sakemm ikompli l-każ.
It-talba saret minn wieħed mill-Avukati tal-akkużati: William Cuschieri li qed jidher għal Alfred Degiorgio magħruf bħala Il-Fulu. Iż-żewġ akkużati l-oħra huma George Degiorgrio magħruf bħala Iċ-Ċiniż u Vince Muscat magħruf bħala Il-Koħħu.
Fil-Qorti, id-difiża qalet li l-ħelsien proviżorju mill-arrest għandu jingħata ġaladarba l-Qorti fadlilha biss tisma’ x-xhieda tal-esperti. Żied jgħid li l-akkużati għandhom jiġu meqjusa bħala innoċenti sakemm, u jekk ma jkunux ikkundannati.
It-talba għall-ħelsien mill-arrest saret waqt li fil-Qorti kompliet tinġabar l-evidenza fil-konfront tat-tliet akkużati – anke jekk il-Qorti tal-Maġistrati diġà sabet biżżejjed evidenza biex it-tliet irġiel jitpoġġew taħt att formali ta’ akkuża.
Fost dawk li xhedu kien hemm erba’ esperti mill-Olanda, li waslu Malta l-għada tal-assassinju – u fost l-ewwel affarijiet li għamlu kien hemm it-tħejjijja ta’ pjan ta’ kif kellha titwettaq l-investigazzjoni b’kollaborazzjoni mal-Pulizija u l-Forzi Armati ta’ Malta.
L-esperti Olandiżi qalu li l-investigazzjoni fuq ix-xena tar-reat damet għaddejja sad-19 ta’ Ottubru – jiġifieri sa tliet ijiem wara l-qtil. Ix-xena tar-reat ġie maqsuma f’kaxxi u kull kaxxa kienet eżaminata minn tim ta’ investigaturi kemm Maltin kif ukoll Olandiżi.
Wieħed mill-ewwel għanijiet tal-investigazzjoni kienet li jinstabu partijiet mill-bomba użata. L-esperti Olandiżi żiedu li l-karozza kellha ħofra kbira taħt is-seat tas-sewwieqa – u l-mod kif il-metall tal-karozza kien mgħawweġ minn ġewwa għal barra jindika li l-bomba tpoġġiet taħt is-seat tas-sewwieq.
L-Olandiżi żied wkoll li l-ġisem tal-vittma nstab maħruq fil-karozza – mingħajr is-sieq tal-lemin. Huma qalu li l-ewwel ħaġa li għamlu kienet li ġabru l-ġisem tal-vittma, ġeżwruh f’liżar sterilizzat u poġġewh f’body bag qabel intbagħat fil-Kamra Mortwarja tal-isptar.
Xehdu wkoll esperti tal-Europol, tlieta b’kollox, wara argument fil-Qorti dwar jekk l-evidenza nġabritx b’mod legali u fil-preżenza tal-akkużati. Tant li d-difiża fetħet kawża Kostituzzjonali oħra biex tisfida l-mod kif inġabret l-evidenza.
L-esperti tal-Europol, li huma speċjalizzati fil-forensika diġitali, waslu Malta f’Diċembru u fost l-investigazzjoni tagħhom kien hemm eżaminazzjoni tal-mobiles li nġabru mill-post fejn ġew arrestati l-irġiel.
Fost dawk li qed jidhru parte civile għall-familja ta’ Daphne Caruana Galizia hemm l-avukati Jason Azzopardi u Therese Comodini Cachia. Il-prosekuzzjoni qed titmexxa mill-Ispetturi Keith Arnaud u Kurt Zahra.
