‘L-Ewropa għandha dejjem tpoġġi lin-nies fiċ-ċentru tal-politika.’, hekk qal il-Kap tal-Partit Nazzjonalista Adrian Delia f’laqgħa mal-Viċi President tal-Grupp tal-Partit Popolari Ewropew (PPE) Dara Murphy, li hu wkoll id-direttur tal-kampanja tal-PPE. Min-naħa tiegħu Dara Murphy assigura lil Adrian Delia li l-PPE se jkun qed jagħti l-appoġġ sħiħ lill-Partit Nazzjonalista fl-elezzjoni tal-Parlament Ewropew.
Din il-laqgħa saret fid-Dar Ċentrali tal-Partit Nazzjonalista u hija waħda minn sensiela ta’ laqgħat ta’ tħejjija li l-Partit Nazzjonalista qed jagħmel flimkien mal-PPE bi tħejjija għall-elezzjoni tal-Parlament Ewropew li se ssir fil-25 ta’ Mejju tas-sena d-dieħla.
Dara Murphy ltaqa’ wkoll mas-Segretarju Ġenerali tal-Partit Nazzjonalista, Clyde Puli. Matul din il-laqgħa ġie diskuss kif il-Partit Nazzjonalista minn dejjem kien il-partit li ħadem, kien u baqa’ favur l-Ewropa u b’hekk ġab ġid kbir għall-Maltin u l-Għawdxin permezz tas-sħubija.
F’din il-laqgħa ġie diskuss kif il-Partit Nazzjonalista bħalissa jinsab għaddej bil-proċess li jressaq aktar nies li jistgħu jkunu kandidati għal din l-elezzjoni biex jagħtu servizz politiku lill-Maltin u l-Għawdxin fuq livell Ewropew.
Il-ħidma tal-Partit Nazzjonalista fl-elezzjoni tal-Parlament Ewropew se tkun qed tiffoka fuq il-ħtiġijiet tan-nies. Is-Segretarju Ġenerali tal-Partit Nazzjonalista kkummenta li l-MEPs li jirrappreżentaw lill-Partit Nazzjonalista fil-Parlament Ewropew ikunu jfissru vuċi aktar soda u qawwija favur il-Maltin u l-Għawdxin f’oqsma importanti bħas-sigurtà, il-qasam soċjali, l-għajnuna lil dawk vulnerabbli u pagi aħjar għall-Maltin u l-Għawdxin.
