Il-Balzanin qamu għan-noti kiebja tal-marċi funebri hekk kif l-artist Gabriel Caruana, li miet fl-età ta’ 89 sena, ingħata l-aħħar tislima kmieni l-Ħamis filgħodu.
Wara korteo funebri matul Triq il-Kbira Ħal Balzan, il-Banda San Gabriel sellmet għall-aħħar darba lill-fundatur tagħha bl-Innu San Gabriel fuq iz-zuntier tal-Knisja Parrokkjali ta’ Marija Annunzjata qabel iddaħħal fil-knisja għall-funeral. Il-quddiesa tqaddset mill-Isqof Elett, Mons. Joe Galea Curmi, u konċelebrata minn għadd ta’ saċerdoti oħra.
Fl-omelija tiegħu quddiem knisja ppakkjata b’familjari u ħbieb ta’ Cassar, iċ-ċelebrant qal li din hija ċelebrazzjoni tal-ħajja ta’ Gabriel Caruana u tal-passaġġ tiegħu għall-ħajja ta’ dejjem.
Huwa dejjem emmen fit-tifsira tal-isem tiegħu – “Il-Mulej hu l-Qawwa tiegħi” – għaliex għaraf juża d-doni li tah fl-arti, partikolarment fiċ-ċeramika, u qasmu m’oħrajn f’Malta u kemm barra minn xtutna.
Bħala Balzani, l-Isqof Elett rringrazzja lil Gabriel Caruana, mhux biss għall-ġieħ li għamel lil Malta, iżda ta kontribut kbir lil Ħal Balzan, b’mod speċjali bit-twaqqif tal-Banda San Gabriel fl-1952 u l-akkwist tal-Każin tal-istess banda biswit il-Knisja ftit snin wara. Ta’ dan il-ġid, il-poplu Balzani jibqa’ grat lejh.
Meta tara l-mod sabiħ kif żviluppa l-arti u taraha rifless tas-sbuħija t’Alla, Galea Curmi qal li Gabriel Caruana għaraf jgħaġġen il-fidi f’Alla mal-ħajja billi jesprimieha fl-arti.
Caruana, meqjus minn ħafna bħala wieħed mill-pijunieri fl-arti moderna u kontemporanja f’pajjiżna, kien spiss spirat mill-arkitettura ta’ pajjiżna, u fl-1999 l-gvern kien onorah b’medalja għal mertu ta’ kisbiet artisitiċi.
Ix-xogħlijiet tiegħu jinsabu f’ kollezzjonijiet f’pajjiżna kif ukoll esibiti f’mużewijiet kemm f’Malta kif ukoll barra minn xtutna fir-Renju Unit, fl-iStati Uniti, fil-Ġermanja, l-Olanda u l-Italja.
Il-Partit Nazzjonalista sellem il-memorja tal-artist Gabriel Caruana u ħeġġeġ sabiex il-legat ta’ Gabriel Caruana jiġi mħares u ma jintilifx. Il-Kap tal-Partit Nazzjonalista Adrian Delia fi tweet qal li Malta tilfet wieħed mill-aqwa artisti, u kif Gabriel Caruana se jibqa’ mfakkar għall-iskulturi u pitturi li juru l-perspettiva tal-ħajja bil-kuluri u l-ferħ.
