Wolves huma lesti li jiffirmaw lill-midfielder Portugiż Joao Moutinho mingħand Monaco għal somma ta’ €5.6 miljun. Il-plejer ta’ 31 sena mistenni jiffirma kuntratt ta’ sentejn.
Moutinho li lagħab 113-il logħba mat-tim nazzjonali, kien importanti fit-tim tal-Portugall li rebaħ l-Euro 2016. Hu t-tielet l-aktar plejer li lagħab mal-Portugiżi wara Cristiano Ronaldo u Luis Figo. Hu se jsegwi lil sieħbu fit-tim nazzjonali Rui Patricio, u mistenni li jifforma koppja f’nofs il-grawnd ma’ Ruben Neves.
Moutinho beda l-karriera tiegħu ma’ Sporting Lisbon qabel ma’ ngħaqad ma’ Porto fl-2010, fejn rebaħ il-Primeira Liga fl-2011, fl-2012 u fl-2013. Hu kien ingħaqad ma’ Monaco fl-2013 għal €24 miljun u mal-klabb Franċiż skorja 11-il gowl f’211-il logħba, fejn fosthom rebaħ il-Ligue 1 fl-2017.
