Illum it-tim nazzjonali Malti jtemm it-tieni esperjenza tiegħu f’fażi finali tal-Kampjonat Ewropew b’konfront kontra t-Turkija, bit-tama ta’ riżultat pożittiv. Inċidentalment, f’Belgrad fl-2016, it-tim Malti kien lagħab il-partita biex jispiċċa fil-15 jew is-16-il post ukoll kontra t-Turkija, logħba li t-tim Malti kien rebaħ 14-13 wara l-għoti tal-penalties hekk kif il-logħba kienet spiċċat fi draw ta’ 10-10.
Il-prestazzjonijiet tal-plejers Maltin varjaw minn logħba għal oħra. L-ewwel żewġ logħbiet kienu kontra timijiet ta’ saħħa mondjali u ftit kien mistenni. It-tim Malti tilef 21-4 kontra Spanja u 17-5 kontra l-Montenegro, bit-tieni logħba tkun aħjar fil-prestazzjoni għaliex it-tim Malti lagħab aktar il-logħba.
Il-logħba kontra Franza kienet ukoll diffiċli iżda l-avversarju kien anqas b’saħħtu minn dak preċedenti. Telfa ta’ 12-6 li għalqet Grupp B, filwaqt li t-tim Malti tejjeb ir-riżultat finali hekk kif kien f’Belgrad kien lagħab ukoll kontra Franza, b’dik il-logħba tintemm 17-7.
Il-Ħadd, it-tim ta’ Karl Izzo kien fl-azzjoni kontra s-Slovakkja, iżda hawn ukoll waslet telfa ta’ 11-6 kontra tim li fuq il-karta ftit aħjar, iżda fil-logħba ftit kien hemm differenza, għajr li s-Slovakki bdew jieħdu vantaġġ minn nuqqasijiet Maltin speċjalment fil-ħarba. F’dan il-każ ukoll li kien hemm titjib hekk kif f’Belgrad ukoll lagħab kontra dan it-tim b’riżultat finali ta’ 17-9.
Karl Izzo jittama li fl-aħħar logħba t-tim Malti jagħti kollox anki għaliex fl-aħħar logħba dehret ukoll ftit għajja fiżika fit-tim. Żgur li l-kowċ nazzjonali ħadem mat-tim fuq il-man-ups hekk kif kull logħba il-persentaġġ ta’ suċċess kien fqir, speċjalment fl-aħħar żewġ logħbiet fejn it-tim kellu aktar okkażjonijiet.
It-tim Malti se jkun żgur mingħajr Dino Zammit li l-Ħadd filgħaxija wasal lura pajjiżna wara li weġġa’ spalltu l-Ġimgħa kontra Franza u mistenni li jdum nieqes mill-azzjoni.
Sfortunatament, fil-logħba kontra s-Slovakkja kellu jinbidel ukoll wara sessjoni l-gowlkiper Nicky Grixti minħabba li kien ma jiflaħx u mistenni jkun nieqes illum. Fortunatament Jake Tanti kellu prestazzjonijiet pożittivi u għalhekk jekk iżomm il-livell li kellu sa issa għandu jkun sostitut denju.
Il-partita kontra t-Turkija hi waħda realistika li t-tim Malti jista’ jirbaħ, iżda żgur li l-plejers Maltin iridu jagħtu l-aħħar sforz u jkunu preċiżi kemm jista’ jkun. Il-perċentwal fil-man-ups irid jitjieb filwaqt li joqogħdu attenti biex minn attakk Malti ma jispiċċax f’attakk u gowl tat-Turkija.
Logħob għal-lum
15 u 16-il post
Turkija v Malta 10.30am
13 u 14-il post
Georgia v Slovakkja 12.00pm
Semifinali 9-12-il post
Olanda v Rumanija 1.30pm
Ġermanja v Franza 3.00pm
Kwarti tal-finali
Serbja v Ungerija 5.00pm
Kroazja v Montenegro 6.30pm
Italja v Russja 8.30pm
Spanja v Greċja 10.00pm
