SIRENS GREENTUBE……………….. 8
SAN ĠILJAN TUM INVEST………… 9
(1-2), (1-2), (3-3), (3-2)
Is-sensiela ta’ logħbiet mingħajr telfa għal San Ġiljan twalet għal 52 logħba, b’rebħa missielta ta’ 9-8 fuq Sirens Greentube. Minkejja r-rebħa l-prestazzjoni tal-Ġiljaniżi ma kinitx brillanti u l-kowċ Marko Orlovic żgur jistenna aktar mill-plejers tiegħu.
Sirens kellhom bidu kajman fil-logħba u dan spiċċa biex pattew qares għalih, anki jekk protestaw diversi drabi fuq il-kontroll tar-referees. Il-kowċ Popovski għandu jkun kuntent bil-prestazzjoni tat-tim fit-tieni parti tal-logħba u jittama li dan iservi ta’ ġid biex jippreparaw tajjeb għall-play-offs u jippruvaw isalvaw l-istaġun.
Gowl ta’ Andreas Galea lejn tmiem l-ewwel sessjoni rebbaħ l-ewwel sessjoni lil San Ġiljan. Kien Nicolas Bicari li fetaħ l-iskor għal Sirens, iżda Peter Borg ġab id-draw momentarju.
San Ġiljan komplew bl-istess ritmu fit-tieni sessjoni u kienu qed jikkontrollaw il-logħba, kompliċi wkoll minn diversi passaġġi żbaljati ta’ Sirens. Andreas Galea skorja t-tieni gowl personali, biex Paulo Obradovic għamilhom 4-1. Jacob Sciberras naqqas id-distakk lejn it-tmiem is-sessjoni.
Iċ-champions dehru resqin li jagħlqu l-logħba meta ħadu vantaġġ ta’ 6-2 b’gowls ta’ Andreas Galea u Ben Plumpton, iżda Sirens reġgħu daħlu fil-logħba b’żewġ gowls ta’ Nicolas Bicari u Marc Grech. Peter Borg għamilhom 7-4, iżda Bicari skorja lejn it-tmiem.
Dan il-gowl ta saħħa ġdida lil Sirens li saħansitra ġabu d-draw b’żewġ gowls ta’ Isaiah Riolo. Paulo Obradovic u Ben Plumpton dehru li taw ir-rebħa għal San Ġiljan, iżda John Brownrigg naqqas id-distakk ftit sekondi wara. Kien fl-aħħar azzjoni tal-logħba li Sirens kellhom man-up iżda naqsu jieħdu vantaġġ minnu biex San Ġiljan reġgħu ssugraw iżda finalment kisbu r-rebħa.
Sirens: N. Grixti, P. Privitera, E. Aquilina, N. Bicari (3), M. Grech (1), I. Riolo (2), C. Mercieca, J. Sciberras (1), J. Napier, G. Sammut, L. Caruana, J. Brownrigg (1), G. Galea Curmi
San Ġiljan: J. Tanti, P. Borg (2), A. Galea (3), B. Grech, C. Farrugia, M. Zammit, B. Plumpton (2), Da. Zammit, T. Said, P. Obradovic (2), P. Fava, D. Ciantar, T. Micallef
Referees: Francesco Romolini, Mario Dalli
