Samuel Eto’o se jkun qed jibda esperjenza oħra fil-karriera tiegħu hekk kif iffirma ma’ Qatar Sports Club. Il-klabb minn Qatar ħabbar dan l-akkwist fuq twitter. Il-plejer ta’ 37 sena se jmur fl-Asja wara li aktar kmieni dan ix-xahar ħalla lit-tim Tork Konyaspor bi qbil reċiproku.
Fil-kampjonat tal-Qatar, hu se jingħaqad mal-eks internazzjonali Spanjol Xavi u l-eks internazzjonali Olandiż Wesley Sneijder. Eto’o li rebaħ darbtejn il-Plejer Afrikan tas-sena, lagħab ma’ Xavi meta kien ma’ Barcelona, kif ukoll ma’ Sneijder fl-Italja ma’ Inter. Hu rebaħ iċ-Champions League maż-żewġ timijiet. Wara li ħalla lil Inter fl-2011, Eto’o lagħab għal diversi timijiet fosthom Chelsea, Everton u Sampdoria.
