Luttu għall-mewt ta’ Aretha Franklin

Messaġġi ta’ niket minn madwar id-dinja tal-ispettaklu għall-aħbar tal-mewt tal-kantanta leġġendarja Amerikana Aretha Franklin li mietet it-Tlieta fl-età ta’ 76 sena wara battalja mal-marda tal-kanċer.

Anki l-President Amerikan Donald Trump, waqt laqgħa mal-ġurnalisti fil-White House, ħa minuta biex lissen is-sogħba kbira tiegħu għall-mewt ta’ Aretha Franklin.

S’issa d-data tal-funeral ma tħabbritx, imma s-sorsi qalu li dan aktarx isir fiċ-Charles H. Wright Museum of African American History f’Detroit minħabba l-folla kbira li mistennija tattendi.

Aretha Franklin, imlaqqma l-Queen of Soul, ukoll kienet tħobb iżżur dan il-post, fejn ukoll kien sar dak ta’ Rosa Parks, ikona tal-ġlieda għad-drittijiet ċivili Amerikani, meta mietet fl-2005.

Aretha Franklin kienet involuta ħafna fil-ġlieda għall-ugwaljanza fl-Istati Uniti, kantat fil-funeral ta’ Martin Luther King fl-1968, u wkoll fl-inawgurazzjoni tal-President Barack Obama fl-2009. King kien ħabib kbir ta’ missierha.

Il-kanzunetta tagħha ‘Respect’ kienet saret l-innu fis-snin sittin tal-kampanja għad-drittijiet ċivili. Tul il-karriera tagħha, hija rebħet 18-il Grammy Award u kellha 17-il kanzunetta fit-Top Ten Amerikani. Fl-2005 ingħatat il-Presidential Medal of Freedom mill-President George W Bush.