Is-sid numru tnejn tad-dinja Roger Federer avvanza għas-semifinali tal-Masters ta’ Cincinnati wara li għeleb lil Stanislav Wawrinka 6-7, 7-6, 6-2. Il-logħba twaqqfet għal 21 minuta hekk kif il-plejers u l-folla preżenti ħallew il-court waqt maltempata ħafifa.
Federer qal li ma kinitx normali li jieqfu minħabba l-maltempata. Hu żied li ma kienx jaf jekk kienx se jkompli iżda rkupra l-enerġija għat-tielet set. Mat-tkomplija tal-logħba, Federer assigura l-ewwel break tal-logħba biex ħa vantaġġ ta’ 4-2 u għalaq il-logħba għat-23 rebħa minn 26 logħba kontra Wawrinka.
It-tennist ta’ 37 sena jilgħab kontra David Goffin fis-semifinali wara li l-Belġjan għeleb lil Juan Martin del Potro 7-6, 7-6.
Is-semifinali l-oħra se tkun bejn Novak Djokovic u Marin Cilic. Wara li għeleb lil Grigor Dimitrov, Djokovic għeleb lill-Kanadiż Milos Raonic. Is-Serb, finalist ħames darbiet f’Cincinnati, qed jittama li jirbaħ il-Masters 1000 li hi l-unika kompetizzjoni li qatt ma rebaħ. Cilic assigura postu mal-aħħar erbgħa wara li għeleb lill-Ispanjol Pablo Carreno Busta 7-6, 6-4.
