ĦAMRUN S. ………………. 2 FLORIANA ………………… 0
Ħamrun: E. Bartolo, A. Monticelli, E Pepe, T. Caruana, R. Nayar, C. Heneberg (R. Darmanin 90’), M. Gauci, N. Priso, K. Micallef, C. Calil, K. Tulimieri (B. Schembri 87’)
Floriana: I. Akpan, M. Saleh, E. Ruiz, S. Pisani, I. Varela, J. Cabral, C. Failla, J. Pisani (P. Wleh 66’), A. Cini (M. Zarb 87’), A. Oyama, E. Marcelina
Imwissija: K. Micallef 43’, N. Priso 74’, B. Schembri (Ħ), M. Saleh 32’, A. Oyama 39’, J. Cabral 72’, (F)
Skorjaw: K. Tulimieri 65’, B. Schembri 88’ (Ħ)
Referee: Malcolm Spiteri
Assistenti Referees: Jurgen Spiteri, Mitchell Scerri
Il-Mument Plejer tal-Logħba: Kevin Tulimieri (Ħamrun Spartans)
Ħamrun Spartans bdew l-istaġun fuq nota mill-iktar pożittiva meta b’żewġ gowls fit-tieni taqsima għelbu l-isfida ta’ Floriana. Il-logħba kellha bidu tajjeb minn naħa ta’ Floriana li fl-ewwel nofs siegħa kellhom ukoll żewġ opportunitajiet ċari ta’ skor.
Iżda iktar ma beda għaddej il-ħin, l-Ispartans bdew jidħlu fil-logħba u fit-tieni taqsima wara li marru fil-vantaġġ ikkontrollaw tajjeb lill-avversarji u għalqu l-logħba lejn it-tmiem bit-tieni gowl.
Ħamrun hu tim kompletament mibdul mis-sena l-oħra wara kampanja akkwisti mill-iktar attiva. Taħt il-kowċ Tedesco li kien sospiż u li b’hekk segwa lit-tim minn qalb il-partitarji Ħamruniżi, l-Ispartans ħallew impressjoni tajba fejn xi akkwisti ġodda bħal Pepe, Priso, Henneberg u Tulimieri ħallew verament impressjoni tajba.
Minn naħa tagħhom Floriana li wkoll kellhom xi wċuħ ġodda, iddiżappuntaw f’din l-ewwel ħarġa tagħhom. Fil-verita Floriana kienu sew fil-logħba sal-ewwel siegħa tagħha iżda wara li sofrew il-gowl ta’ Tulimieri, naqqsu li jwettqu reazzjoni anzi dehru mill-iktar fjakki u neqsin mill-ideat fl-attakk. Kien hawn li d-difiża Ħamruniża mmexxija mill-eks Pepe, spikkat u ma tat l-ebda ċans lill-Greens jerġgħu jidħlu fil-logħba.
Il-logħba kellha bidu verament kwiet biż-żewġ naħat jistudjaw lil xulxin. Minkejja dan, kienu iktar il-Greens l-iktar li ħadu l-inizjattiva. Wara 22 minuta Floriana kelhom ċans tad-deheb meta Steve Pisani qassam lejn Varela li l-first-timer tiegħu kien salvat b’mod brillanti minn Bartolo.
Seba’ minuti wara ċans ieħor tad-deheb għal Floriana meta Matthew Grech qassam ħażin lura lill-gowlkiper tiegħu u daħal tajjeb Juninho Cabral li waħdu quddiem Bartolo ra x-xutt tiegħu salvat bi bravura minn Bartolo. Minuta wara Ħamrun sfortunati meta minn free-kick ta’ Grech, id-daqqa ta’ ras ta’ Calil ħabtet ma’ sieq il-lasta.
Fit-tieni taqsima Floriana bdew xi ftit aħjar u kien hemm tentattivi ta’ Cabral u Ruiz li fallew il-mira. Mas-siegħa logħob, inizjattiva ta’ Tulimieri li x-xutt tiegħu kien imxellef minn Ruiz u Akpan salva b’diffikultà.
Fil-65 minuta l-iskor infetaħ. Priso qassam lejn Henneberg li dan kompla bir-ras lejn KEVIN TULIMIERI li mattar siequ u xeħet fir-rokna tax-xibka. Floriana dehru maħsuda u konfużi fir-reazzjoni tagħhom u d-dħul tal-attakkant Liberjan Patrick Wleh ma ħalliex l-effett mixtieq.
Wara l-pressjoni sterili ta’ Floriana, Ħamrun għalqu l-logħba bit-tieni gowl fit-88 minuta meta Priso rebaħ ballun barra l-kaxxa, qassam lejn Henneberg li kompla lejn is-sostitut BRADLEY SCHEMBRI li minn żewġ passi bogħod ma żbaljax.
