SLIEMA W. ……………………. 3 VALLETTA ……………………. 0
Sliema: J. Galea, M. Mucciardi, K. Shaw, J. Mintoff, M. Scerri (M. Sansone 74’), M. De Assis Jefferson (E. Agius 86’), R. Fenech (J.P. Farrugia 90’), N. Ashong, F. Temile, G. Adamovic, S. Bincardi.
Valletta: H. Bonello, S. Borg, R. Camilleri (J. Borg 73’), G. Cruz, S. Malano, M. Picciolo, M. Pena Beltre, J. Zerafa, I. Saleh, M. Alba (K. Nwoko 59’), M. Fontanella.
Referee: Philip Farrugia
Assistenti Referees: Luke Portelli, Dusan Petrovic
Skorjaw: K. Shaw 42’, R. Fenech 60’, 83’ (S)
Imwissija: S. Bianciardi 39’ (S), J. Gill Cruz 85’ (V)
Il-Mument Plejer tal-Logħba: Ryan Fenech (Sliema Wanderers)
Attendenza: 1315
Iċ-champions Valletta kienu umiljati minn Sliema Wanderers fl-ewwel ħarġa tagħhom fid-difiża għat-titlu mirbuħ fl-istaġun li għadda. Bla dubju li r-riżultat hu wieħed mill-iktar sorpendenti, iżda l-Wanederers ma serqu xejn fejn Sliema kienu għal kollox superjuri, filwaqt li għal kuntrarju Valletta taw waħda mill-agħar prestazzjonijiet tagħhom, fejn prattikament il-Beltin m’għamlu xejn tajjeb f’disgħin minuta deludenti.
Sliema lagħbu logħba tattikament perfetta, jikkontrollaw lill-avversarji u b’logħob veloċi jaqbdu lill-Beltin dejjm fuq sieq waħda. Għal Ryan Fenech wirja tajba u doppjetta f’debutt mill-iktar pożittiv għalih mal-Wanderers.
Bidu kwiet tal-logħba bil-Beltin jieħdu mill-ewwel l-inizzjattiva u wara għaxar minuti kellhom l-ewwel opportunitá b’xutt mid-distanza ta’ Matteo Piciollo li kien salvat minn Galea b’diffikultá.
Fl-20 minuta azzjoni Slimiża bix-xutt fil-baxx ta’ Jefferson salvat minn Bonello. Ftit wara azzjoni bejn Malano u Picciolo bix-xutt tal-eks Floriana jmur barra. Mark Scerri pprova mid-distanza iżda l-ballun mar barra.
Valletta ppruvaw b’azzjoni ta’ Saleh fuq il-lemin iżda x-xutt tiegħu falla kompletament il-mira. Fl-aħħar fażi tat-taqsima kien hemm xutt ta’ Ryan Fenech li mar ftit barra biex fit-42 minuta Sliema fetħu l-iskor meta minn azzjoni ta’ korner mogħti mill-istess Fenech kien KURT SHAW kompletament żmarkat quddiem Bonello li bir-ras xeħet fix-xibka.
Fit-tieni taqsima Valletta ħarġu jfittxu l-gowl tad-draw u resqu qrib fit-52 minuta meta ninn kross ta’ Pena Beltre, Malano mil-viċin ra d-daqqa ta’ ras tiegħu salvata minn Galea.
Tliet minuti wara Sliema ferm sfortunati li ma rduppjawx meta f’azzjoni konfuża fil-kaxxa Beltija, Mucciardi laqat il-lasta u henry Bonello wettaq żewġ saves inkredibbli fuq Jefferson u Temile. Mas-siegħa logħob Sliema skorjaw it-tieni gowl meta direttament minn free-kick RYAN FENECH ħasad għal kollox lil Bonello.
Valletta xeħtu kollox fl-attakk iżda b’mod mill-iktar konfuż u kien biss fl-aħħar għaxar minuti li resqu qrib b’xutt bid-dawra ta’ Fontanella li bħal kumplament tat-tim kellu wirja fqira.
Żewġ minuti wara Sliema għalqu l-logħba bit-tielet gowl meta Frank Temile żmarka lil RYAN FENECH li avvanza prattikament waħdu minn nofs grawnd u quddiem Bonello ma żbaljax biex skorja t-tieni gowl tiegħu u kompla kabbar l-umiljazzjoni taċ-champions.
