Rapport: Keane Cutajar
SENGLEA A…………….. 0
MOSTA…………………… 2
Senglea: P. Schranz, D. Micallef, B. Muscat (D. Buckle 80’), F. Salvati, L. Grech, S. Moccia (M. Guillari 46’), B. Volpini, B. Gonzalez, N. Lahrach, K. Cutajar, M. Cisse (K. Xuereb 73’)
Mosta: A. Vella, A. De Cerchio (K. Zammit 90’), K. Hirose, K. Frendo (D. Xuereb 55’), R. De Oliveira, M. Sammartino, M. Gomez (J. Brincat 82’), T. Farrugia, Z. Brincat P. Romeu, F. Mazzavillani
Imwissija: F. Salvati 19’, N. Lahrach 23’, B. Muscat 77’ (S)
Tkeċċa: N. Lahrach 85’ (S)
Skorjaw: A. De Cerchio 8’, M. Sammartino 45’ (M)
Referee: Jude Amin Utulu
Assistenti Referees: Duncan Sultana, Duncan Spencer
In-Nazzjon Plejer tal-Logħba: Kei Hirose (Mosta)
Mosta akkwistaw l-ewwel rebħa filwaqt taw it-tieni telfa tal-kampjonat lil Senglea Athletic. Tul ħafna mill-ħin tal-partita, Mosta ddominaw u kienu xi ftit aħjar mill-avversarji anke meta tikkunsidra l-azzjonijiet lejn il-lasti.
Appena għaddew tmien minuti, Mosta fetħu l-iskor. ALESSIO DE CERCHIO lemaħ lil Philip Schranz barra minn postu u ma ħasibx darbtejn biex ittanta xortih minn nofs il-grawnd, ballun li spiċċa fix-xibka.
Minuta biss wara, Senglea għal ftit ma ġabux id-draw meta minn free-kick dirett mil-limiti tal-kaxxa, il-captain Ferdinando Salvati laqat il-lasta.
Mosta rrdupjaw sekondi minn tmiem l-ewwel taqsima wara xogħol tajjeb ta’ Renan Abner De Oliveira li wassal biex il-ballun spiċċa għand MASSIMO SAMMARTINO li mill-kaxxa ż-żgħira, wiċċ imb wiċċ ma’ Schranz, xeħet ġewwa.
Fit-53 minuta, Kei Hirose ltaqa’ ma’ kross mil-lemin iżda sab ix-xutt tiegħu mill-kaxxa ż-żgħira mblukkat tajjeb minn fuq il-linja mill-gowlkiper ta’ Senglea, bid-difensuri jirnexxielhom ibiegħdu l-periklu qabel Hirose seta’ jerġa’ jipprova.
Żewġ minuti wara, Misael Miranda Gomez kien żvinturat li ra x-xutt tiegħu bid-dawra jaħbat mal-wieqfa, xutt li wasal wara xogħol tajjeb tal-attakanti Mostin.
Leighton Grech prova jdaħħal lit-tim tal-Isla lura fil-partita għal darba darbtejn fit-63 u fit-68 minuta meta daħal fil-kaxxa mil-lemin iżda sab lil Andreas Vella attent li salvalu darbtejn.
Fl-aħħar 20 minuta ftit li xejn rajna azzjonijiet bl-iktar waħda denja ta’ nota tkun it-tkeċċija ta’ Eddine Nour Lahrach li kien muri t-tieni karta safra għal daħla li spiċċa weġġa hu stess minnha biex kellu jinħareġ mill-grawnd fuq strecher.
(Ritratti: Martin Agius)
