Il-bidu negattiv ta’ Manchester United kompla meta sfaw megħluba 3-0 minn Tottenham Hotspur. Din kienet it-tieni telfa fi tliet logħbiet għal Manchester United filwaqt li Tottenham saru r-raba’ tim b’punti massimi wara tliet logħbiet.
Manchester United kienu l-aħjar tim matul l-ewwel taqsima b’diversi okkażjonijiet, iżda wara li Tottenham skorjaw fil-bidu tat-tieni taqsima, irduppjaw il-vantaġġ mill-ewwel u minn hemm Manchester United kienu demoralizzati biex iwettqu reazzjoni denja.
Manchester United fetħu tajjeb u wara ftit sekondi marru viċin b’xutt ta’ Fred li spiċċa ftit barra. Okkażjoni tad-deheb għar-Red Devils fis-16-il minuta meta Romelu Lukaku ħa vantaġġ minn passaġġ lura ħażin ta’ Danny Rose, qabeż lil Hugo Lloris iżda x-xutt djagonali tiegħu għadda ftit barra.
Tottenham kellhom żewġ okkażjonijiet fil-bidu tat-tieni taqsima u marru wkoll minn fuq fil-50 minuta meta minn korner ta’ Kieran Trippier, Harry Kane żmarka ruħu minn ma’ Phil Jones u għeleb lil David De Gea b’daqqa ta’ ras għar-rokna.
L-iskor sar 2-0 żewġ minuti wara meta d-difiża ta’ Manchester United inqabdet fuq sieq waħda, b’Christian Eriksen jitfa’ kross fil-baxx mil-lemin lejn Lucas Moura li daħal tajjeb bejn żewġ plejers u għeleb lil De Gea b’xutt fil-baxx.
Ir-reazzjoni ta’ Manchester United wara dawn iż-żewġ gowls ma kinitx effettiva għajr konklużjonijiet sporadiċi, bl-aħjar ċans tagħhom jasal f’nofs it-tieni taqsima permezz ta’ Jesse Lingard.
L-affarijiet komplew ġejjin ħżiena għal Manchester United fl-84 minuta meta huma sofrew it-tielet gowl b’azzjoni personali ta’ Lucas Moura li fiha għadda l-ballun bejn saqajn Chris Smalling, avvanza u b’xutt b’saħħtu għar-rokna għeleb lil De Gea.
