NEPTUNES LEO VEGAS……… 11
SLIEMA FRANK SALT…………. 8
(5-4), (3-0), (2-3), (1-1)
Neptunes Leo Vegas saru l-ewwel tim li għadda għall-finali b’rebħa konvinċenti u meritata fuq Sliema Frank Salt. It-tim ta’ Jovan Popovic kien aktar konċentrat fil-logħob u ħa vantaġġ mill-mumenti l-aktar importanti tal-logħba, fosthom it-8-4 ta’ Niki Lanzon qabel tmiem it-tieni sessjoni, u ż-żewġ saves ta’ Alan Borg Cole lejn it-tmiem it-tielet sessjoni.
B’din it-telfa Sliema temmew it-tamiet li jirbħu l-ewwel kampjonat mill-2009. Minkejja d-diżappunt kien hemm titjib fit-tim ta’ Sliema u l-kowċ Sergio Afric jittama li dan l-istaġun iservi ta’ pedament biex jisfidaw l-istaġun li ġej.
Il-partita uriet mill-bidu l-importanza tagħha biż-żewġ timijiet joħorġu determinati li jieħdu vantaġġ bikri. Kienu Sliema li fetħu tajjeb u marru darbtejn fil-vantaġġ, iżda wara li Muslim ġab id-draw, kienu żewġ gowls mill-isbaħ ta’ Jordan Camilleri li taw vantaġġ doppju lil Neptunes.
Michael Spiteri Staines naqqas id-distakk b’xutt mid-distanza, iżda Gabriel Pace għamilhom 5-3 b’man-up maħdum tajjeb. Kai Dowling skorja gowl importanti eżatt qabel tmiem l-ewwel taqsima.
It-tieni sessjoni kienet differenti hekk kif Neptunes kienu aħjar mill-avversarji. Huma kienu aktar aggressivi, skorjaw gowl ieħor minn man-up filwaqt li Sliema kienu erratiċi quddiem il-lasta.
Stevie Camilleri għamilhom 6-4, Petar Muslim skorja gowl mill-isbaħ mis-centre biex fl-aħħar sekonda Niki Lanzon kabbar il-vantaġġ għal erba’ gowls wara li d-difiża ta’ Sliema nqabżet fuq sieq waħda.
Bħal ma ġara fil-logħba preċedenti, Sliema ħarġu aħjar fit-tielet sessjoni u daħlu fil-logħba b’żewġ gowls konsekuttivi, bil-gowl ta’ Nicholas Bugelli jasal minn żball ta’ Matthias Azzopardi.
Jordan Camilleri għamilhom 9-6 b’lob sabiħ, iżda Zach Mizzi wieġeb b’xutt mill-isbaħ minn pożizzjoni ċentrali. Madankollu s-centre Jeremy Abela reġa’ kabbar il-vantaġġ. Importanti kienu żewġ saves ta’ Alan Borg Cole qabel tmiem is-sessjoni li żammew lil Sliema distakkati.
It-tim ta’ Afric prova jsalva l-logħba iżda naqas li jsib gowl kmieni, b’Petar Muslim jiskorja l-gowl tal-11-7 biex il-gowl ta’ Mark Meli kien inutli hekk kif it-tama ta’ Sliema bdiet tonqos filwaqt li Neptunes ikkontrollaw sat-tmiem.
Neptunes: A. Borg Cole, N. Lanzon (1), K. Erdogan, G. Pace (1), P. Muslim (3), N. Zammit, S. Camilleri (1), J. Camilleri (4), J. Abela (1), M. Zammit, J. Muscat, M. Azzopardi, J. Parnis
Sliema: J. Sammut, J. Gabarretta (1), C. Presciutti, J. Saliba, M. Meli (1), K. Dowling (1), M. Spiteri Staines (1), D. Fenech, M. Cordina, J. Gambin (1), Z. Mizzi (1), N. Bugelli (1), Z. Sciberras
Referees: Peter Balzan, Attilio Paoletti
