Illum fil-Pixxina Nazzjonali tintlagħab l-ewwel finali minn possibbiltà ta’ tlieta għar-rebħ tal-Kampjonat Premier bejn Neptunes Leo Vegas u San Ġiljan TUM Invest. Partita miftuħa għal kull riżultat b’San Ġiljan jibdew ftit favoriti minħabba li huma ċ-champions u kollox ma’ kollox kellhom staġun aħjar mill-avversarji.
Iżda fl-aħħar logħbiet, San Ġiljan naqqsu mir-ritmu fejn rebħu diversi logħbiet b’distakk ta’ gowl filwaqt li tħabtu fis-semifinali tal-play-offs kontra Sirens fejn rebħu logħba bil-ħin barrani u tilfu biex intemmet is-sensiela ta’ 54 logħba mingħajr telfa. Fit-tielet logħba sa nofs l-aħħar sessjoni ir-riżultat kien inċert iżda rnexxielhom jibqgħu kompatti biex rebħu.
Neptunes kellhom mument inċert meta sofrew żewġ telfiet konsekuttivi kontra Exiles u l-istess San Ġiljan u kellhom għadma iebsa kontra Sliema fis-semifinali. Meta jkunu fil-forma tagħhom, Neptunes huma perikolużi f’kull dipartiment u hu mistenni li dawn il-konfronti jkunu simili bħad-draw ta’ 10-10 bejn iż-żewġ timijiet fl-ewwel rawnd tal-ewwel fażi.
Illum ukoll jilagħbu Sliema Frank Salt u Sirens Greentube għat-tielet u r-raba’ post bl-istess format. It-tnejn huma diżappuntati li ma waslux sal-finali iżda se jfittxu li jtemmu t-tielet biex jispiċċaw l-istaġun fuq nota sodisfaċenti. L-istaġun li għadda kienu Sirens li spiċċaw it-tielet fil-klassifika u għalhekk iridu jżommu posthom filwaqt li Sliema jridu juru li għamlu progress.
Birżebbuġa Freeport se jkunu qed jirritornaw jilagħbu meta jaffrontaw liċ-champions Marsaxlokk Brown’s Pharmacy fl-ewwel finali għar-rebħ tal-Kampjonat tal-Ewwel Diviżjoni. Birżebbuġa temmew l-ewwel fażi fil-quċċata u b’hekk għaddew direttament fil-finali. Huma kellhom jistennew biex isiru jafu l-avversarju tagħhom b’Marsaskala u Marsaxlokk jeliminaw lil Otters u Ta’ Xbiex rispettivament, biex fis-semifinali Marsaxlokk ħarġu rebbieħa. Wieħed irid jara din il-waqfa kemm se tkun ta’ benefiċċju għal Birżebbuġa.
Logħob għal-lum
Kampjonat Premier
L-ewwel finali
Neptunes v San Ġiljan 8.00pm
Għat-tielet u r-raba’ post
Sliema v Sirens 6.45pm
Kampjonat I Diviżjoni
L-ewwel finali
M’xlokk v Birżebbuġa 5.30pm
