Spanja kisbet it-tieni rebħa importanti fi ftit jiem meta ġabet fix-xejn lit-tim nazzjonali tal-Kroazja b’rebħa kbira ta’ 6-0 f’logħba li ntlagħbet Estadio Martinez Valero. Għat-tim Kroat din kienet l-ewwel logħba wara li tilfu t-Tazza tad-Dinja f’Lulju li għadda.
L-Ispanjoli marru fil-vantaġġ fl-24 minuta meta minn kross ta’ Dani Carvajal daħal tajjeb Saul Niguez li għeleb lil Lovre Kalinic b’daqqa ta’ ras. L-iskor sar 2-0 fit-33 minuta meta Marco Asensio ħa vantaġġ minn żball fid-difiża tal-Kroazja, u skorja b’xutt b’saħħtu minn barra l-kaxxa. Spanja marru tlieta minn fuq żewġ minuti wara meta xutt ta’ Asensio ħabat mal-mimduda u ħabat ma’ dahar Kalinic qabel daħal fix-xibka.
Spanja kompliet tkabbar l-iskor fid-49 minuta meta Rodrigo għeleb lin-nasba tal-offside, avvanza u għeleb lil Kalinic, wara li kien irċieva passaġġ tajjeb. Kien imiss lid-difensur Sergio Ramos li jkabbar l-iskor, hekk kif il-captain għamilhom 5-0 fis-57 minuta b’daqqa ta’ ras minn korner ta’ Asensio.
Isco skorja s-sitt gowl fis-70 minuta b’azzjoni personali li fiha skorja b’xutt mill-isbaħ.
F’konfront ieħor minn Diviżjoni A, l-Iżlanda sofriet it-tieni telfa fi ftit jiem, meta wara s-6-0 ta’ kontra l-Iżvizzera, tilfet 3-0 kontra l-Belġju f’logħba li ntlagħbet f’pajjiżha.
Il-Belġju marret fil-vantaġġ fid-29 minuta meta Romelu Lukaku ġie mwaqqaf b’mod irregolari fil-kaxxa. Mill-11-il metru Eden Hazard skorja b’xutt fil-baxx. Żewġ minuti wara l-iskor sar 2-0 meta minn korner, id-daqqa ta’ ras b’saħħitha ta’ Vincent Kompany kienet salvata parzjalment, bil-ballun jispiċċa għand Romelu Lukaku li kkontrolla u skorja mir-rebound.
Il-partita ngħalqet fil-81 minuta bi kross mil-lemin ta’ Dries Mertens fil-kaxxa lejn Romelu Lukaku, bl-attakkant jiskorja meta kompla għal ġewwa mill-ewwel.
Il-Bożnja fetħet l-impenji tagħha fil-UEFA Nations League b’rebħa ta’ 1-0 fuq l-Awstrija. Il-gowl li ddeċieda l-logħba wasal fit-78 minuta meta l-attakkant Edin Dzeko rċieva ballun fuq ix-xellug, daħal fil-kaxxa u għamel spazju għalih biex b’xutt djagonali fil-baxx għeleb lil Heinz Lindner.
Riżultati oħra
Diviżjoni Ċ – Grupp 2
Finlandja v Estonja 1-0
Ungerija v Greċja 2-1
Diviżjoni D – Grupp 2
Moldova v Belarus 0-0
San Marino v Lussemburgu 0-3
