Zlatan Ibrahimovic irnexxielu jiskorja l-500 gowl fil-karriera tiegħu hekk kif skorja ġmiel ta’ gowl fit-telfa li Los Angeles Galaxy kellhom kontra Toronto. B’hekk ingħaqad ma’ Lionel Messi u Cristiano Ronaldo bħala l-uniċi plejers attivi li skorjaw dan l-ammont ta’ gowls.
Galaxy kienu 3-0 minn taħt qabel tmiem l-ewwel taqsima, bl-Iżvediż idur dawra sħiħa biex skorja b’xutt mill-ewwel bit-takkuna. Toronto eventwalment rebħu l-logħba 5-3.
“Kuntent għal Toronto għaliex se jkunu mfakkra bħala l-500 vittma tiegħi,” qal Ibrahimovic lil TSN wara l-logħba. Dan kien is-17-il gowl fi 18-il logħba għal Los Angeles Galaxy minn meta ngħaqad magħhom f’Marzu mingħand Manchester United. Bħalissa hu t-tieni l-aqwa skorer fil-Major Soccer League dan l-istaġun.
Zlatan Ibrahimovic li għandu 36 sena, fil-karriera tiegħu lagħab ma’ Malmo, Ajax, Juventus, Inter, Barcelona, Milan, PSG, Manchester United u Los Angeles Galaxy, b’total ta’ 438 gowl skorjat f’747 logħba. Ma’ dawn il-gowls jiżdiedu 62 gowl ieħor li skorja f’114-il logħba mat-tim nazzjonali tal-Iżvezja.
