“Se nkompli nitkellem fl-Ewropa f’isem il-poplu Malti u Għawdxi kollu, u naħdem b’mod konkret biex inħares l-interessi tan-nies f’dak kollu li bħala pajjiż jolqtna mill-qrib”, il-Kap tal-Partit Nazzjonalista Adrian Delia qal dan wara li attenda s-summit tal-Partit Popolari Ewropew (PPE) li sar f’Salzburg.
Dr Delia ddiskuta flimkien mal-Prim Ministri u l-Kapijiet tal-Oppożizzjoni ta’ pajjiżi oħra Ewropej, li huma wkoll membri tal-PPE. Matul dan is-summit ġew diskussjoni sitwazzjonijiet kurrenti fl-Ewropa fosthom is-sitwazzjoni ekonomija, il-Brexit u prinċiparjament l-immigrazzjoni.
Adrian Delia ddefenda l-interessi ta’ Malta u wassal il-vuċi tal-poplu Malti u Għawdxi kollu matul dan is-summit. Huwa ħeġġeġ lill-mexxejja politiċi l-oħra biex verament jinstabu s-soluzzjoni biex tingħeleb l-isfida tal-immigrazzjoni. Dan għaliex l-immigrazzjoni mhix sfida ta’ Malta biss iżda tal-Unjoni Ewropea kollha. Dr Delia qal li huwa meħtieġ li l-pajjiżi kollha tal-Unjoni Ewropea jkunu magħqudin biex tingħeleb din l-isfida.
Il-Kap tal-Partit Nazzjonalista Adrian Delia kellu wkoll numri ta’ laqgħat bilaterali. Fuq l-aġenda tad-diskussjoni matul is-summit kien hemm ukoll il-Kungress tal-PPE li jmiss li se jsir f’Helsinki f’Novembru li ġej, fejn Adrian Delia se jkun qed jirrappreżenta lill-Partit Nazzjonalista.
Għal dan is-summit tal-Partit Popolari Ewropew f’Salzburg attendew fost l-oħrajn, il-President tal-Kummissjoni Ewropea Jean-Claude Juncker, il-President tal-Parlament Ewropew Antonio Tajani, ċ-Chairman tal-PPE Manfred Weber u s-Segretarju Ġenerali Antonio-Lopez Isturiz. Takkumpanja lill-Kap tal-Partit Nazzjonalista Adrian Delia kien hemm is-Segretarju Internazzjonali tal-partit Roselyn Borg Knight.
