“Bil-passjoni u mħabba għall-isport ksibtu suċċess li qatt ma kiseb tim Malti f’dan il-livell. Dan huwa ta’ eżempju għat-tfal u żgħażagħ Maltin.” Kliem il-Kap tal-Partit Nazzjonalista Adrian Delia fi żjara lil Valletta Subbuteo Club fil-Belt Valletta f’għeluq it-tletin sena mill-ftuħ ta’ dan il-klabb. Din kienet parti minn sensiela ta’ żjarat li Adrian Delia qed jagħmel f’diversi clubs u organizzazzjonijiet f’pajjiżna.
Adrian Delia ġie milqugħ mill-President Felix Rizzo u mis-Segretarja tal-klabb Monalita Balzan. Preżenti kien hemm ukoll il-kelliem tal-Oppożizzjoni dwar iż-Żgħażaġħ u l-Isport Ryan Callus.
Felix Rizzo stqarr li l-klabb għandu diversi plejers b’esperjenza internazzjonali fejn filfatt Valletta Subbuteo Club rebaħ diversi Grand Prix u l-Europa League fl-2016. Uħud mill-plejers ta’ dan il-klabb jinsabu fl-ogħla postijiet fir-rankings mondjali. Fl-aħħar ġimgħa ta’ Ottubru l-klabb mistenni jieħu sehem fiċ-Champions League li se ssir fi Spanja. It-Tim Nazzjonali Malti tat-table football kien rebaħ it-titlu ta’ champions mondjali fl-2010. Uħud mill-plejers li kienu parti minn dan it-tim huma membri fil-Valletta Subbuteo Club.
Il-Kap tal-Partit Nazzjonalista Adrian Delia awgura lill-plejers kollha għall-kompetizzjoni li se jieħdu sehem fiha fl-aħħar ta’ dan ix-xahar. Huwa ammira d-dedikazzjoni li għandhom u faħħar l-impenn tagħhom f’dan l-isport. Tfal u żgħażagħ Maltin għandhom jieħdu eżempju minn dawn il-plejers għax permezz tal-passjoni u l-imħabba tagħhom għal dan l-isport, kisbu suċċess li qatt ma kiseb tim Malti f’dan il-livell.
Waqt li kompla jitkellem mal-pleyers fejn qasmu l-esperjenzi tagħhom miegħu, Adrian Delia sab ukoll ftit ħin biex jilgħab magħhom.
