Ġie arrestat f'Ħal Kirkop l-Erbgħa bil-lejl
Karkariż ta’ 17-il sena ġie arrestat l-Erbgħa filgħaxija f’Ħal Kirkop wara li nqabad isuq illegalment karrozza. Il-Pulizija, waqt ronda fl-inħawi, kellhom suspetti dwar il-karrozza li ġiet irrapurtata misruqa aktar kmieni fl-Imsida.
Il-każ seħħ għall-ħabta tal-10.30pm meta l-Pulizija mir-Rapid Intervention Unit pruvaw iwaqqfu liż-żagħżugħ. Dan minflok, saq għal fuq uffiċjal u wara li ma laqtux, ħarab minn fuq il-post b’karrozza tat-tip Nissan March. Huwa ġie arrestat ftit tal-ħin wara ġirja bil-karrozzi.
Stħarriġ preliminari tal-Pulizija rriżulta li ż-żagħżugħ kien fil-kumpanija ta’ tfajla, li ġiet arrestata ftit tal-ħin wara li ħarbet fuq il-post.
L-investigazzjonijiet tal-Pulizija mill-Għassa tal-Imsida għadhom għaddejjin.
