Gowl lejn it-tmiem ta’ Angel di Maria salva punt lil Paris Saint Germain fi draw ta’ 2-2 f’Parc des Princes kontra Napoli, bit-tim Taljan jibqa’ punt fuq iċ-champions Franċiżi.
LORENZO INSIGNE poġġa lil Napoli minn fuq fid-29 minuta meta qabbeż fuq Alphonse Areola wara passaġġ intelliġenti ta’ Callejon. PSG ġabu d-draw fil-61 minuta meta minn kross ta’ Thomas Meunier, Mario Rui xellef il-ballun u għeleb lil David Ospina għal awto-gowl sfortunat.
Napoli reġgħu marru minn fuq fis-77 minuta b’opportuniżmu ta’ DRIES MERTENS iżda fit-93 minuta kien ANGEL DI MARIA li għeleb lil Ospina b’xutt sabiħ minn tarf il-kaxxa li spiċċa fir-rokna.
Liverpool telgħu fil-quċċata ta’ Grupp Ċ b’rebħa faċli ta’ 4-0 fuq Red Star Belgrade. ROBERTO FIRMINO fetaħ l-iskor fl-20 minuta minn pożizzjoni ċentrali, biex qabel tmiem l-ewwel taqsima MOHAMED SALAH irdoppja l-iskor. L-istess MOHAMED SALAH għamilhom tlieta fil-51 minuta minn penalty, biex SADIO MANE skorja r-raba’ gowl fit-80 minuta wara li erba’ minuti qabel kien falla penalty.
Barcelona kisbu t-tielet rebħa fi Grupp B b’rebħa meritata ta’ 2-0 fuq Inter. Il-Katalani fetħu l-iskor fit-32 minuta meta RAFINHA daħal tajjeb bejn iż-żewġ difensuri avversarji biex iltaqa’ ma’ kross mil-lemin u għeleb lil Samir Handanovic b’xutt mill-ewwel.
Barcelona kellhom aktar pussess iżda naqsu li jirduppjaw, b’Inter jibqgħu fil-logħba b’attakki sporadiċi. Kien fit-82 minuta li t-tim ta’ Valverde għalaq il-logħba, b’azzjoni tajba fuq ix-xellug li fiha JORDI ALBA rċieva ballun fil-kaxxa u b’konklużjoni għar-rokna għeleb lil Handanovic.
Minkejja t-telfa, Inter irċevew aħbar tajba minħabba d-draw ta’ 2-2 bejn PSV u Tottenham, biex għadhom fit-tieni post, ħames punti vantaġġ fuq iż-żewġ timijiet. HIRVING LOZANO poġġa lil PSV minn fuq man-nofs siegħa logħob wara li ħa vantaġġ minn żball ta’ Toby Alderweireld. Reazzjoni tajba ta’ Tottenham li l-ewwel ġabu d-draw fid-39 minuta minn LUCAS MOURA, biex fil-55 minuta kien HARRY KANE li għamilhom 2-1 b’daqqa ta’ ras. Fid-79 minuta Tottenham kellhom lill-gowlkiper Hugo Lloris li tkeċċa, b’LUUK DE JONG iġib id-draw tmien minuti wara hekk kif mattar siequ biex għeleb lil Michel Vorm.
Tispikka wkoll ir-rebħa kbira minn Grupp A li Borussia Dortmund kellhom fuq Atletico Madrid 4-0. AXEL WITSEL fetaħ l-iskor fit-38 minuta u RAPHAEL GUERREIRO rdoppja l-iskor fit-73 minuta. JADON SANCHO għalaq il-logħba fl-84 minuta, biex reġa’ kien RAPHAEL GUERREIRO li skorja t-tieni gowl personali ħames minuti wara.
Riżultati
Grupp A – Club Brugge v Monaco 1-1 , Borussia Dortmund v Atletico Madrid 4-0
Grupp B – Barcelona v Inter 2-0 , PSV v Tottenham 2-2
Grupp Ċ – Liverpool v Red Star Belgrade 4-0 , PSG v Napoli 2-2
Grupp D – Galatasaray v Schalke 0-0 , Lokomotiv Moscow v Porto 1-3
