GŻIRA U…………………. 3 BALZAN………………….. 0
Gżira: J. Haber, J. Corbalan (C. Sammut 90’), T. Veronese, R. Soares, F. Barbosa, R. Briffa, E. Zarate, Z. Scerri, N. Muscat, A. Samb (Jorginho 83’), H. Garba (L. Brincat 88’)
Balzan: S. Sultana, J. Grioli (S. Arab 71’), I. Bozovic, N. Sljivic, E. Serrano, D. Camilleri, M. Lepovic, U. Ljubomirac, R, Correa, Lecaò, A. Effiong
Skorja: H. Garba 56’, 80’, 86’ (G)
Imwissija: N. Sljivic 30’, I. Bozovic 32’ (B), Z. Scerri 71’ (G)
Tkeċċa: N. Sljivic 45’ (B)
Referee: Alan Mario Sant
Assistenti Referees: Edward Spiteri, Thomas Debono
Il-Mument Plejer tal-logħba: Haruna Garba (Gżira United)
Rapport: George Cassar
Haruna Garba skorja tliet darbiet fit-tieni taqsima kontra Balzan biex b’hekk it-tim tiegħu Gżira United żamm l-ewwel post kif ukoll l-imbattibbiltà wara tmien logħbiet. Il-partita kienet ikkundizzjonata minn tkeċċija qabel tmiem l-ewwel taqsima li ħalliet lil Balzan jikkumbattu kontra t-tim tal-ewwel post għal taqsima sħiħa bi plejer inqas.
Balzan kienu viċin il-gowl fit-tmien minuta meta Lecaò qabeż lill-gowlkiper Justin Haber fuq il-ġirja iżda l-captain tal-ġurnata Roderick Briffa baqa’ jsegwi l-azzjoni u waqqaf ix-xutt tal-Brażiljan milli jidħol fix-xibka.
Qabel intemmet l-ewwel taqsima kien hemm azzjoni li rriżultat f’waħda kruċjali għall-andament tal-kumplament tal-partita. Id-difensur Serb Nenad Sljivic ġie ġġudikat li ostakola lil Nikolai Muscat fil-kaxxa u r-referee Alan Mario Sant urieh il-karta safra għat-tieni darba u allura l-ħamra filwaqt li ordna penalty favur Gżira. Amadou Samb żamm l-appuntament u bħas-soltu mar hu biex jagħti l-penalty iżda l-gowlkiper ta’ Balzan Steve Sultana ntefa’ fuq in-naħa t-tajba u żamm ix-xutt tas-Senegaliż.
It-tieni taqsima Balzan lagħbuha kollha b’għaxar plejers u wara għaxar minuti mill-bidu tagħha sofrew l-ewwel gowl. L-eks Edison Zarate kien intelliġenti biex fetaħ id-difiża avversarja b’pass perfett lejn HARUNA GARBA li x-xutt b’saħħtu tiegħu spiċċa fix-xibka wara devjazzjoni tas-sostitut Michael Johnson li mattar siequ fit-tentattiv li jimblokka.
Għaxar minuti mit-tmiem, Gżira għamluha iktar diffiċli lil Balzan hekk kif skorjawlhom it-tieni gowl. HARUNA GARBA rċieva l-ballun mingħand Roderick Briffa u fajjar xutt spettakolari li spiċċa fir-rokna leminija ta’ fuq ta’ Steve Sultana għall-isbaħ gowl tal-ġurnata.
Erba’ minuti mit-tmiem HARUNA GARBA għaqqad it-tripletta meta s-sostitut Jorginho approfitta minn nuqqas ta’ ftehim bejn Ivan Bozovic u Milos Lepovic, ħa l-ballun u tah mill-ewwel lill-attakkant Niġerjan li evita l-ħarġa ta’ Sultana qabel skorja għat-tielet darba.
Fi tmiem il-partita ċ-ċelebrazzjonijiet ġustifikati tal-plejers ta’ Gżira kienu madwar il-protagonist assolut Haruna Garba li żamm mat-tradizzjoni tal-futbol u ħa l-ballun miegħu bħala premju tat-tripletta li skorja.
