Skiet totali mill-Gvern wara l-provi li ppunnlika dan is-sit dwar il-mod kif l-iskart separat xorta qed jispiċċa jitħallat – jekk mhux fit-trakkijiet tal-kolletturi, fis-siti immexxija mill-Wasteserv.
Ritratti ġodda li kiseb Net News juru kif anke f’lokalitajiet fiċ-ċentru tal-pajjiż qed ikompli dan it-taħlit tal-iskart.
Fir-ritratt li qed taraw (fuq) mal-boroż is-suwed tħallat l-iskart tar-riċiklaġġ, fejn hu ċar li f’numru ta’ boroż kien hemm ukoll ammont ta’ jablo u kartun.
“It-tħalit tal-iskart qed isir madwar Malta kollha”, sostna wieħed mill-qarrejja tagħna.
Fl-aħħar sigħat, irċivejna ukoll numru ta’ ritratti li juru x’qed jiġri meta l-iskart jasal fid-destinazzjoni tiegħu – sitwazzjoni li l-ġurnalisti tagħna qed ikomplu jinvestigaw bir-reqqa.
Diversi residenti li kkuntatjaw lil Net News matul din il-ġimgħa qalulna illi fil-lokalitajiet tagħhom qed jinnotaw ħafna skart mitluq fit-toroq. Xi ħaġa li sax-xahar li għadda ma kinitx tiġri. Persuna fuq Facebook kiteb “din ma jdumx ma tinbidel fi problema nazzjonali”, b’referenza għall-ħmieġ eżaġerat li qed naraw madwarna f’postijiet pubbliċi.
