SLIEMA WANDERERS…………. 2 QORMI…………………… 0
Sliema: J. Galea, M. Sansone (J. Mintoff 89’), J. Pearson, S. Biancardi (K. Shaw 84’), N. Ashong, R. Fenech, C. Pani, M. Muchardi, M. Scerri, Y. Marzouk, J. de Assis (C. Olivares 79’)
Qormi: J. Azzopardi, A. Cassar, A. Abela, D. Mansi, M. Micallef, K. Soares, Y. Yankam, A. Ferreira (T. Gusman 75’), K. Seo In (M. Arrieta 69’), M. Camilleri (I. Zammit 56’), N. Turkovic
Imwissija: M. Camilleri 9’ (Q), M. Scerri 46’, C. Pani 83’, M. Muchardi 91’ (S)
Skorjaw: M. Muchardi 32’, J. de Assis 70’, (S)
Referee: Darryl Agius
Assistenti Referees: Roberto Vella, Darko Stankovic
Il-Mument Plejer tal-logħba: Younes Marzouk (Sliema Wanderers)
Attendenza: 291
Wara żewġ telfiet konsekuttivi, Sliema Wanderers irritornaw għar-rebħ wara li għelbu lil Qormi 2-0. Logħba li fiha Sliema ddominaw għal ħafna ħinijiet iżda ma għamlux assedju fil-lasta ta’ Jamie Azzopardi.
Dan għaliex Qormi kienu kostretti li jiddefendu u jagħlqu l-ispazji, b’konsegwenza li l-gowlkiper Slimiż Jake Galea rari kien impenjat. Qormi kienu taħt it-tmexxija temporanja ta’ Matthew Psaila wara li Brian Spiteri rriżenja kmieni din il-ġimgħa.
Wieħed ma jistax ma japprezzax l-isforzi li għamlu ż-żewġ timijiet li lagħbu l-logħba sħiħa taħt xita kontinwa, bil-kundizzjoni tal-pitch ma tkunx perfetta speċjalment wara li ntlagħbet il-logħba ta’ qabilha.
Sliema ħarġu mill-ewwel fuq l-attakk u kienu f’kontroll tal-partita, b’Qormi aktar difensivi jippruvaw jagħlqu l-ispazji. Dan wassal biex Sliema bdew isibuha diffiċli biex jheddu l-lasta u kellhom jgħaddu 24 minuta biex kienu perikolużi, bi free-kick ta’ Matias Muchardi jkun imxellef u spiċċa ftit barra.
Ħames minuti wara, Jamie Azzopardi kellu jkun attent biex dawwar f’diffikultà għal korner xutt ta’ Pani li kien imxellef. Il-gowl kien qed jersaq u wasal fit-32 minuta meta Younes Marzouk krossja bix-xellug mil-lemin, b’Jefferson de Assis jidħol tajjeb iżda x-xutt mill-viċin kien salvat parzjalment minn Azzopardi, bil-ballun jispiċċa għand MATIAS MUCHARDI li skorja mill-qrib.
Sliema marru qrib li jirduppjaw fil-45 minuta bi kross mix-xellug ta’ Muchardi lejn Marzouk, iżda d-daqqa ta’ ras tal-aħħar kienet salvata b’riflessi tajbin minn Azzopardi. L-ewwel periklu ta’ Qormi wasal proprju fl-aħħar azzjoni tal-ewwel taqsima, bi free-kick mix-xellug ta’ Kim Seo-In isib lil Alexsandro Ferreira li impenja lil Jake Galea b’daqqa ta’ ras għar-rokna leminija, iżda Galea dawwar f’korner.
Bil-kundizzjoni tal-pitch tmur għall-agħar, ir-ritmu tal-logħba naqqas ftit, b’Qormi jippruvaw ukoll joħorġu ftit mill-qoxra difensiva iżda mingħajr ma jinkwetaw lil Jake Galea.
Sliema marru qrib li jirduppjaw mas-siegħa logħob b’azzjoni personali ta’ Younnes Marzouk li ġibed għan-nofs iżda x-xutt tiegħu għadda fuq il-lasta. Is-Slimiżi serrħu rashom mit-tliet punti fis-70 minuta meta Qormi taw free-kick ħażin, b’Sliema jitfgħu l-ballun ‘l fuq. Sfortunatament Alessio Cassar żelaq u ppermetta lil JEFFERSON DE ASSIS biex jaqbad il-ballun f’pożizzjoni ċentrali u b’xutt fil-baxx għar-rokna xellugija għeleb lil Azzopardi.
