Valletta saħħew l-iskwadra bl-akkwist tas-centre Peter Borg mingħand San Ġiljan. Il-plejer ta’ esperjenza ffirma kuntratt ta’ ħames snin u ħalla lil San Ġiljan wara erba’ snin fejn magħhom dak kollu li joffri l-waterpolo lokali.
Fl-istaġun li għadda Peter Borg spiċċa fil-11-il post fil-klassifika tal-aqwa skorers bi 22 gowl skorjat. Hu kien utilizzat spiss mill-kowċ Ġiljaniż Marko Orlovic speċjalment wara li kien weġġa’ Dino Zammit. Borg skorja fil-logħbiet kollha tal-kampjonat għajr l-aħħar żewġ logħbiet.
Ma’ San Ġiljan, Peter Borg ifforma parti mit-tim li għamel 54 logħba mingħajr telfa u rebaħ total ta’ 13-il unur fl-erba’ snin mal-klabb. Hu rebaħ darbtejn il-Kampjonat tas-sajf, tliet darbiet il-Kampjonat tax-xitwa, tliet darbiet it-Tazza tal-President, erba’ darbiet in-knock-out u darba l-Enedmed Cup f’perjodu riċenti fejn San Ġiljan iddominaw ix-xena lokali.
Borg stabbilixxa ruħu ma’ Sirens u fl-2012 ingħaqad ma’ Exiles fejn magħhom dam tliet staġuni u skorja total ta’ 49 gowl fl-istaġun tas-sajf. Fl-2015 hu kien trasferit ma’ San Ġiljan b’total ta’ 61 gowl skorjat fl-erba’ staġuni tas-sajf li lagħab magħhom.
