Wieħed mill-persuni li qed jassisti lill-Pulizija Taljana f’investigazzjoni dwar l-infiltrazzjoni tal-mafja fis-settur tal-logħob onlajn ġie avviċinat minn persuni relatati mal-mafja waqt li kien f’pajjiżna.
Mario Gennaro kien ġie arrestat fl-2015 f’pajjiżna, bħala parti mill-investigazzjoni Gambling, flimkien ma’ Margherita Giudetti, Francesco Ripepi, Alessandro Ciaffi u Rocco Rippingala. Huma ġew estraditi lejn l-Italja biex jaffaċċjaw akkużi li minn pajjiżna mexxew soċjetajiet ta’ logħob onlajn, b’mod speċjali BetuniQ, li ġew użati mill-mafja.
Minn dak iż-żmien Gennaro ddeċieda li jikkollabora mal-Pulizija u kixef il-mod kif kienet taħdem din is-sistemà u min kienu l-persuni nvoluti. Issa, waqt investigazzjoni ġdida bl-isem ta’ Operazione Galassia, żvela kif meta kien f’pajjiżna kien vittma ta’ estorsjoni meta l-mafja talbitu xi ħlas.
Id-dikjarazzjonijiet ta’ Gennaro lill-Pulizija wasslu biex fost oħrajn kienu arrestati Domenico Tegano (ritratt) u Antonino Augusto Polimenti, mill-grupp mafjuż ta’ Archi. Fost oħrajn jinsabu akkużati li f’isem il-mafja talbu madwar €30,000 lil Gennaro.
Il-kollaboratur tal-ġustizzja tkellem mal-Pulizija u qal li lejn pajjiżna ntbagħat Domenico Tegano biex ifittxu u fost oħrajn jitolbu €30,000. Domenico hu iben il-boss tal-mafja Pasquale Tegano u neputi ta’ boss ieħor, Franco Polimeni.
Fid-dikjarazzjonijiet ta’ Gennaro lill-Pulizija jingħad li skopra li Tegano kien qed ifittxu f’pajjiżna iżda pprova jevitah. Dan billi telaq mill-uffiċju fil-ġurnata li wasal f’Malta u minflok tah appuntament f’ġurnata u ħin meta kien jaf li Tegano kien se jkun fuq ajruplan lura lejn l-Italja.
Din il-mossa xejn ma għoġbot lil Tegano u l-familja tal-majfa. Tant hu hekk li xi żmien wara, Trgano rritorna f’Malta u mar fl-uffiċċju ta’ Gennaro mingħajr m’avżah biex b’hekk kien kostrett jiltaqa’ miegħu. Kien hawn li ż-żagħżugħ beda jsemmilu lil missieru u zijuh u Gennaro ddeċieda li jaqbad u jmur il-bank biex jiġbor terz tat-talba li saritlu, jiġifieri €10,000, dak il-ħin stess. Saret ukoll talba li BetuniQ timpjega lil ħuħ, liema talba kienet rifjutata: “Ma tarax, mela trid li jarrestawni,” kienet ir-risposta ta’ Gennaro.
Din ir-risposta u s-somma mgħoddija xejn ma kienu meqjusa sodisfaċenti imma Gennaro baqa’ jinsisti li ma jħallasx iktar. Bi tpattija u fis-sigħat bikrin tal-4 ta’ Marzu tal-2015, Tegano u Polimenti għattew wiċċhom, rikbu mutur u għaddew minn quddiem uffiċċju tal-kumpanija BetuniQ ta’ Gennaro fl-Italja u waddbu xkora mimlija bi kważi kilograma splussiv. Din l-ixkora splodiet u kkawżat ħsarat konsiderevoli fl-uffiċċji imma wkoll residenzi u vetturi fil-qrib.
Xahrejn wara, fis-16 ta’ Mejju, l-istess tnejn wettqu l-istess ħaġa quddiem uffiċċju ieħor tal-istess kumpanija. Din id-darba qabbdu niċċa li kienet imqabbda ma’ flixkun tal-plastik mimli b’madwar 1.6 kilogramma splussiv iżda li fortunatament ma splodiex.
L-investigazzjoni tal-Pulizija fl-Italja qed turi dejjem iktar kif pajjiżna sfortunatament spiċċa maħkum mill-mafja, li qed tuża s-settur tal-logħob tal-flus onlajn għall-ħasil tal-flus u l-ħabi ta’ minn fejn ġejjin il-flus li huma tant importanti biex tkompli din il-ħidma kriminali.
Dan joħroġ biċ-ċar mill-investigazzjoni massiċċa li għaddejja bħalissa fl-Italja, fejn fost oħrajn interċettazzjonijiet tal-Puliija Taljana kixfu lil numru ta’ persuni involuti waqt li jiddikjaraw: “M’għandniex bżonn iktar lil nies armati bil-pistoli.”
Fl-aħħar jiem filfatt il-Pulizija fl-Italja wettqu għexieren ta’ arresti jew provvedimenti oħra fil-konfront ta’ persuni meqjusa fil-qofol ta’ din is-sistemà kriminali li toriġina mill-Puglia. Dan apparti diversi perkwiżizzjonijiet u sekwestri madwar l-Ewropa li jlaħħqu valur ta’ iktar minn biljun ewro, inkluż flus li kienu f’kontijiet bankarji f’Malta.
Tant saret reali l-infiltrazzjoni tal-mafja fis-settur tal-logħob onlajn, li fil-jiem li ġejjin mistenni jkun iffirmat ftehim bejn l-Awtorità Maltija tal-Logħob (MGA) u l-Guardia di Finanza tal-Italja biex tiżdied il-kollaborazzjoni bejn iż-żewġ partijiet.
F’xhieda ta’ kemm Malta hi fil-qofol ta’ dak li għaddej, l-awtoritajiet kienu mitluba jikkollaboraw fl-investigazzjoni Operazione Galassia bħala parti minn ħidma konġunta mal-Eurojust (l-aġenzija ġudizzjarja tal-Unjoni Ewropea), kif ukoll l-awtoritajiet ta’ diversi pajjiżi oħra.
