Malta hi gżira li għandha l-vantaġġ li fiha popolazzjoni żgħira u għalhekk jista’ jkollha l-ambizzjoni li tilħaq il-mira ta’ zero mwiet fit-toroq.
Iżda biex isir dan hemm bżonn ta’ infurzar serju, minbarra regoli stretti u iktar edukazzjoni. Iddikjara dan Jean Todt, eks General Manager tal-iskuderija tal-Ferrari u llum-il ġurnata President tal-Federazzjoni Internazzjonali tal-Karozzi.
Waqt konferenza tal-aħbarijiet, Jean Todt ikkritika l-infurzar f’pajjiżna wara li nnota li mal-wasla tiegħu f’Malta, mhux kulħadd kien liebes seat belt fil-karozza li kien qed jivvjaġġa fiha.
Illum-il ġurnata Todt hu wkoll Ambaxxatur tan-Nazzjonijiet Uniti dwar is-Sigurtà fit-Toroq, u juża l-popolarità biex iwassal messaġġi pożittivi u jmexxi kampanji edukattivi.
Waqt konferenza li fakkret il-vittmi tat-toroq, bit-tema “It-toroq għandhom storja,” kien innutat li kull sena fl-Ewropa jmutu mal-85,000 persuna fis-sena kawża ta’ inċidenti stradali, biċ-ċifra titla għal 1.3 miljun persuna jekk wieħed iħares lejn id-dinja kollha.
Dan waqt li ntqal li l-pajjiżi differenti jistgħu jitilfu bejn 7% u 22% tal-GDP tagħhom jekk ma jinvestux fis-sigurtà tat-toroq tagħhom.
Jean Todt innota fost l-oħrajn li f’pajiżna, kull xahar, nesperjenzaw żieda ta’ 1,000 karozza, u għalhekk enfasizza fuq ħames punti importanti biex innaqqsu l-imwiet: kontroll u monitoraġġ tal-veloċità, l-użu tas-seat belt u l-helmet u li wieħed ma’ jsuqx taħt l-effett tal-alkoħol jew waqt li juża l-mobile.
