Din hija intervista ma’ anzjan Ingliż ta’ 64 sena, Jeffrie Court, li l-għeluq ta’ Satabank f’pajjiżna fisser ukoll li flusu kollha jinsabu maqbuda u ma jista’ jagħmel xejn.
Biex joħroġ flusu, Jeffrie jrid jiftaħ kont bankarju f‘bank ieħor, iżda dan mhux possibbli, jew għax il-banek li jikkuntattja jagħlqulu l-bieb f’wiċċu meta jsemmilhom li kien klijent ta’ Satabank, inkella għax qed jitolbuh riferenza bil-miktub.
Madankollu lanqas din mhi għażla possibbli, hekk kif Satabank jinsab magħluq u allura m’hemm ħadd min jagħmillu din ir-riferenza.
U fid-dawl ta’ dan kollu, Jeffrie jinsab fl-għama dwar x’qed jiġri, tant li ltqajna miegħu wara waħda miż-żjarat regolari tiegħu, għalxejn, fl-uffiċċji ta’ Satabank f’San Ġiljan.
Jeffrie ilu ftit inqas minn ħames snin jgħix f’pajjiżna. Ġie hawn meta mardet ommu, li sfortunatament tilef is-sena li għaddiet, u kien hawn li għażel li jibqa’ f’pajjiżna.
Emozzjonat, tant li f’mument żamm milli jibki, Jeffrie tkarrab lill-awtoritajiet biex isolvu din il-kwistjoni u joħorġu lilu u lil eluf oħra minn din il-kriżi li tagħha ma jaħtu xejn.
