Rapport eżaġerat wassal għal paniku sħiħ f’għadd ta’ toroq fil-Marsa. Dan hekk kif għall-ewwel, il-Pulizija rċeviet rapport li seħħet aggressjoni b’arma li taqta’ u bil-ponta fi Triq l-Istalel.
Iżda fil-post, il-Pulizija sabu li seħħ argument bejn erba’ rġiel ta’ nazzjonalità barranija, għalkemm ma dehrux traċċi ta’ argumenti fiżiċi.
Għaldaqstant, l-Ambulanza li ssejħet, telqet mill-post vojta. Madankollu, aktar tard reġgħet intbagħtet minħabba rapporti ġodda li wieħed mill-barranin ħarab għal Triq is-Serkin, kantuniera bogħod mit-triq fejn seħħ l-argument.
Sorsi li tkellmu ma’ NET News qalu li fl-għajjat ta’ waqt l-argument, saret referenza għal xi arma li taqta’ u bil-ponta u dan kompla jżid il-paniku f’nofs it-triq. Iżda tfittxija intensiva mill-Pulizija ssarrfet fin-negattiv.
Aktar investigazzjonijiet tal-Pulizija għadhom għaddejjin.
