Il-Pulizija qed iżżomm numru ta’ immigranti, li jlaħħaq madwar 18-il persuna, wara li nstab li qed jgħixu b’mod illegali f’remissa fil-Marsa.
Net News jinsab infurmat li l-arresti saru meta l-Pulizija, it-Tlieta filgħaxija, issejħu fuq rapport ta’ ġlieda kbira, għajjat u storbju u saħansitra li kienet intużat arma li taqta’ u bil-ponta fi Triq l-Istalel.
Dan wassal biex fil-post intbagħtu numru kbir ta’ uffiċjali tal-Pulizija, kemm mid-Distrett kif ukoll mir-Rapid Intervention Unit. Madankollu ma nstabet l-ebda kommissjoni jew traċċi ta’ din il-ġlieda.
Eventwalment il-Pulizija sabu li f’remissa fl-inħawi kien hemm grupp kbir ta’ barranin li għamlu minnha r-residenza permanenti tagħhom.
Kien hawn li l-uffiċjali tal-Pulizija skoprew li wħud minn dawn il-barranin, madwar 18, kien skadielhom il-permess tar-residenza tagħhom f’pajjiżna.
Is-suspett tal-Pulizija hu li persuna mhux magħrufa għamlet rapport dwar ġlieda kbira bħala skuża biex l-uffiċjali jmorru fil-post u jiskopru b’dawn il-persuni li kienu qed jgħixu llegalment fl-inħawi.
In-numru ta’ persuni arrestati mill-istess inħawi żdied l-Erbgħa filgħodu, meta l-Pulizija kompliet bir-rondi u kontrolli.
9 persuni jinżammu mill-Pulizija wara tfittxijiet fiż-żoni tal-Marsa u l-Ħamrun
