Il-plejer internazzjonali Malti Jordan Camilleri rebaħ l-unur tal-Plejer tas-Sena għall-ewwel darba fil-karriera tiegħu. Camilleri kellu staġun mill-aqwa fejn kien strumentali biex Neptunes rebħu l-Kampjonat Premier wara li għelbu lil San Ġiljan fil-finali tat-tielet u l-aħħar play-off.
Din kienet sena importanti għal Camilleri hekk kif minbarra l-impenji li kellu ma’ Neptunes, lagħab fil-Kampjonat Ewropew f’Barcelona għat-tieni edizzjoni konsekuttiva, kif ukoll għall-ewwel darba qed jilgħab barra minn Malta ma’ Roma Nuoto fil-Kampjonat Taljan A1.
Camilleri li għandu 25 sena hu plejer versatili, iżda bla dubju li wieħed mill-aktar pożizzjonijiet li jispikka fihom hi fid-difiża. F’dan l-istaġun ma’ Roma Nuoto, Camilleri sab ix-xibka erba’ darbiet f’seba’ logħbiet filwaqt li fil-Kampjonat tas-sajf Camilleri skorja 44 gowl.
Dan il-ġurnal għamel kuntatt ma’ Camilleri fejn qal li dan l-unur ifisser ħafna għalih għaliex hu rikonoxximent tad-dedikazzjoni tiegħu lejn dan l-isport kif ukoll is-sagrifiċċji kollha li għamel matul is-sena. “Naħseb li kien l-aqwa staġun fil-karriera tiegħi u determinat li nkompli nibni fuq dan is-suċċess fil-futur.”
Ir-rebbieħa kollha
Kampjonat Premier Jordan Camilleri (Neptunes)
Kampjonat I Diviżjoni Christian Gialanze (Marsaxlokk)
Kampjonat tan-nisa Louise Cachia (Sliema)
Kampjonat U20 Jeremy Abela (Neptunes)
Kampjonat U17 Ken Erdogan (Neptunes)
Kampjonat U15 Jake Muscat (Neptunes)
Kampjonat U13 Alec Fenech (Sliema)
