Ir-rekords ta’ 500 miljun klijent tal-grupp tal-lukandi Marriott International spiċċaw suġġetti għall-hacking f’sitwazzjoni oħra inkwetanti dwar abbuż ta’ data.
Kelliema għall-grupp qalu li d-database għall-booking tar-residenti tat-taqsima Starwood tiegħu spiċċa ‘kompromess minn elementi mhumiex awtorizzati’. Investigazzjoni interna żvelat li hacker irnexxielu jsib aċċess għan-network ta’ Starwood mill-2014 u fl-aħħar sigħat kellhom ikunu notifikati l-klijenti li għandhom ir-rekords fid-database.
Il-lukandi fit-taqsima Starwood tal-Marriott International jinkludu l-W Hotels, Sheraton, Le Meridien u Four Points by Sheraton, Il-lukandi bil-brand tal-Marriott jużaw sistema separata għall-kljenti li jridu jirriservaw l-akkommodazzjoni fuq network differenti.
Kien proprju tagħmir għas-sigurtà interna li ġibed l-attenzjoni tat-Tmexxija tal-Marriott Group li xi ħadd kien qed jipprova jidħol fid-database ta’ Starwood. L-informazzjoni fid-database kienet tinkludi fost oħrajn ismijiet, indirizzi tal-emails, numri telefoniċi, numri tal-passaporti u dettalji oħra ta’ xi 327 miljun klijent tal-lukandi fit-taqsima Starwood.
