Rapport: Keane Cutajar
QORMI…………………… 1 HIBERNIANS………………. 5
Qormi: J. Azzopardi, F. Gnindokponou, Y. Yankam, S. Kim, M. Micallef, A. Abela, A. Cassar, A. Ferreira (I. Zammit 51’), L. Adamec (G. Gesualdi 38’), M. Borg (M. Camilleri 72’), T. Gusman
Hibernians: R. Briffa, D. Vella (J. Bezzina 60’), N. Radojevic, J. Mbong, M. Dias (D. Xuereb 74’), J. Degabriele, B. Kristensen, I. Ntow, T. Marcolino (T. Costa 46’), A. Agius, T. Fonseca
Imwissija: G. Gesualdi 58’, M. Borg 63’, M. Micallef 87’ (Q) B. Kristensen 53’, R. Briffa 81’, T. Costa 87’ (H)
Skorjaw: M. Micallef 50’ (Q) T. Marcolino 11’, 14’, 16’, J. Degabriele 45’, I. Ntow 88’ (H)
Referee: Stefan Pace
Assistenti Referees: William Debattista, Dusan Petrovic
Hibernians avvanzaw għar-raba’ rawnd tal-FA Trophy meta b’faċilità u prattikament fl-ewwel kwarta tal-logħba għelbu lil Qormi biex issa jistennew il-verdett ta’ bejn San Ġwann u Fgura United biex isiru jafu ma’ min ser jiltaqgħu.
L-ewwel azzjoni tal-partita waslet wara seba’ minuti minn free-kick ta’ Qormi li kien mogħti minn Michael Borg, free-kick li attent għalih kien Rudy Briffa li b’akrobazija dawwar f’korner.
Hibernians fetħu l-iskor bir-risposta immedjeta tagħhom, erba’ minuti wara. TAYLON MARCOLINO seraq ballun minn viċin nofs il-grawnd, avvanza, għamel spazju għalih innifsu u minn mal-limiti tal-kaxxa xeħet wara Jamie Azzopardi.
It-tim ta’ Stefano Sanderra ma damx biex irdoppja meta żewġ minuti wara, kien l-istess TAYLON MARCOLINO li laħaq ballun qabel l-gowlkiper minn tarf il-kaxxa fuq il-ġirja, għeleb b’veloċità lid-difensur u poġġa fix-xibka.
Għaddew biss tliet minuti u TAYLON MARCOLINO skorja t-tielet għat-tim ta’ Raħal Ġdid u t-tripletta personali meta rċieva fil-kaxxa u b’kumdità dawwar fir-rokna. Tripletta f’16-il minuta mill-bidu tal-logħba u f’temp ta’ ħames minuti, xi ħaġa li jekk xejn rari rajna fil-futbol lokali.
Hibs għaqqdu l-poker minuta minn tmiem l-ewwel taqsima meta Isaac Ntow daħal tajjeb mix-xellug u qata’ ‘l barra lejn JURGEN DEGABRIELE li mill-viċin niżżel ismu fost l-iskorers.
Qormi naqqsu d-distakk fil-50 minuta hekk kif Stefan Pace saffar għal penalty wara li Ntow waqqa’ lil Freud Gnindokponou fil-kaxxa, penalty li minnu MANOLITO MICALLEF ma żbaljax.
ISAAC NTOW għalaq l-partita bil-ħames gowl fit-88 minuta wara xogħol impekkabbli ta’ Joseph Mbong mal-linja u b’mod brillanti qabeż xejn anqas minn erba’ avversarji fi spazju żgħir qabel qassam lil Ntow f’tarf il-kaxxa.
